കോട്ടയം: പതിറ്റാണ്ടുകളായി കള്ളപ്പണം വെളുപ്പിക്കാനുള്ള ഉപാധിയായി സഹകരണ പ്രസ്ഥാനങ്ങളെ സിപിഎം മാറ്റിയെന്ന് ബിജെപി സംസ്ഥാന അധ്യക്ഷൻ കെ. സുരേന്ദ്രൻ. ഊരാളുങ്കൽ ലേബർ സൊസൈറ്റി ദുരൂഹതയുടെ കൂടാരമാണെന്നും സുരേന്ദ്രൻ കോട്ടയത്ത് നടത്തിയ വാർത്താസമ്മേളനത്തിൽ ആരോപിച്ചു. സഹകരണ ബാങ്കുകളില്‍ പണം നിക്ഷേപിച്ചവര്‍ക്ക് ഒരു ചില്ലികാശ് പോലും നഷ്ടപ്പെടില്ലെന്ന് മുഖ്യമന്ത്രിക്ക് എങ്ങനെ ഗ്യാരണ്ടി പറയാനാവുമെന്നു കെ.സുരേന്ദ്രന്‍ ചോദിച്ചു.
സഹകരണ പ്രസ്ഥാനത്തിന്റെ അന്തകനായി സിപിഎമ്മും പിണറായി സർക്കാരും മാറി. 800 മുതൽ 1000 കോടി രൂപ വരെയാണ് തട്ടിപ്പ് നടത്തിയിരിക്കുന്നത്. മൊയ്തീനിലും, സതീശനിലും, കണ്ണനിലും മാത്രം ഒതുങ്ങുന്നതല്ല ഇതിലെ ആരോപണങ്ങളെന്നും അദ്ദേഹം ചൂണ്ടിക്കാട്ടി. ഇന്ത്യയിലെ ഏറ്റവും വലിയ കോര്‍പ്പറേറ്റ് സ്ഥാപനങ്ങളിലൊന്നാണ് സിപിഎം. അദാനിയേക്കാളും, അംബാനിയേക്കാളും സാമ്പത്തിക അടിത്തറയും, ആസ്തിയും ഉള്ള പ്രസ്ഥാനമായി സിപിഎം. അനുബന്ധ പോഷക സംഘടനകളും കുറഞ്ഞ കാലം കൊണ്ട് മാറിയെന്നതിനാൽ ഈ സഹകരണ മേഖലയിലെ പണം എല്ലാം ഏങ്ങോട്ടൊക്കെ പോയി എന്നത് വ്യക്തമാകും.
സിപിഎമ്മുകാര്‍ നടത്തുന്ന അഴിമതിയുടെ പിഴ പൊതുഖജനാവില്‍ നിന്നാണോ അടയ്‌ക്കേണ്ടത്. സിപിഎമ്മിന്റെ പണം കൊടുത്ത് നിക്ഷേപകരുടെ കടം വീട്ടണം. സഹകരണ മന്ത്രിമാര്‍ തന്നെ നേരിട്ട് സഹകരണ കൊള്ള നടത്തുന്ന സംസ്ഥാനമായി കേരളത്തെ മാറ്റിയത് സിപിഎമ്മാണെന്നും അദ്ദേഹം പറഞ്ഞു. ഊരാളുങ്കൽ ലേബർ സൊസൈറ്റിയുടെ 82% ഓഹരി സർക്കാരിനുണ്ടെങ്കിൽ ഇതിന്റെ ആസ്തികൾ, ഉറവിടം, നിക്ഷേപകർ ആരൊക്കെ, നിയമനം ഏങ്ങനെ, കരാർ നേടുന്നതിലെ വ്യവ്യവസ്ഥകൾ ഇതൊക്കെ ജനത്തെ അറിയിക്കേണ്ടതായിരുന്നു. സർവ മാനദണ്ഡങ്ങളും മറികടന്നാണ് 6,000 കോടിയുടെ ഇടപാടുകൾ ഊരാളുങ്കൽ നടത്തിയിരിക്കുന്നതെന്നും കെ. സുരേന്ദ്രൻ പറഞ്ഞു.
ഊരാളുങ്കലിന്റെ പല ഇടപാടുകൾക്കും സർക്കാർ തന്നെ ഈടു നിന്നതിൽ തന്നെ ദുരൂഹതയുണ്ട്. ഇതുകൊണ്ടാണ് ഹൈക്കോടതിയിൽ മറുവാദം ഉയർത്തിയവർ കേസ് സുപ്രീം കോടതിയിൽ എത്തിയപ്പോൾ മാത്രം സർക്കാരിന്റെ ഓഹരി പങ്കാളിത്തം വ്യക്തമാക്കിയത്. സഹകാരികളുടെ പണം പാർട്ടിക്കാർ തന്നെ കൊളളയടിച്ചിട്ട് നഷ്ടത്തിലായ ബാങ്കിന്റെ ബാധ്യത ഏറ്റെടുത്തു കൊണ്ടുള്ള സർക്കാർ നയം അംഗീകരിക്കില്ല.
മിനിമം ഒരു ബാങ്ക് എങ്കിലും കൊളളയടിച്ചിട്ടുള്ളവരെയേ സിപിഎം സഹകരണ മന്ത്രിയാക്കുകയുള്ളൂ എന്നും വി.എൻ വാസവന്റെയും, കടകംപളളി സുരേന്ദ്രന്റെയും മുൻകാല ആരോപണങ്ങൾ ചൂണ്ടിക്കാട്ടി സുരേന്ദ്രൻ വിമർശിച്ചു. ഇല്ലാത്ത ആളുകളുടെ പേരിൽ വ്യാജ വായ്പ തരപ്പെടുത്തി കോടിക്കണക്കിന് രൂപയാണ് തട്ടിയെടുത്തിരിക്കുന്നത്. ഇതിൽ സിപിഎമ്മിന്റെ ഉന്നത നേതാക്കന്മാരും, മന്ത്രിമാരും വരെ ഉൾപ്പെട്ടിട്ടുണ്ടെന്നും അദ്ദേഹം ആരോപിച്ചു.
വിഷയത്തിൽ ബിജെപി ഉയർത്തുന്ന സമരത്തിന്റെ ഭാഗമായി ഒക്റ്റോബർ 2ന് കരുവന്നൂർ സർവീസ് സഹകരണ ബാങ്കിൽ നിന്ന് തൃശൂർ സഹകരണ ബാങ്കിലേക്ക് ബഹുജനപദയാത്ര മാർച്ച് സംഘടിപ്പിക്കുമെന്നും കെ.സുരേന്ദ്രൻ പറഞ്ഞു. ബി.ജെ.പി കോട്ടയം ജില്ലാ പ്രസിഡന്‍റ് ജി. ലിജിൻലാലും വാർത്താ സമ്മേളനത്തിൽ പങ്കെടുത്തു.
പ്രതികരിക്കാൻ ഇവിടെ എഴുതുക: