കൊച്ചി: കോടിക്കണക്കിന് രൂപയുടെ കേന്ദ്രഫണ്ട് ലഭിച്ചിട്ടും ജല്ജീവന് മിഷന് താളം തെറ്റാന് കാരണം ആസൂത്രണത്തിലെ പിഴവാണെന്ന് ബിഎംഎസ് ദേശീയ സമിതിയംഗം കെ.കെ. വിജയകുമാര്. അടിയന്തരമായി കേന്ദ്ര സംസ്ഥാന സര്ക്കാരുകള് നേരിട്ട് ഇടപെട്ട് പദ്ധതി നടപ്പാക്കണമെന്ന് അദ്ദേഹം ആവശ്യപ്പെട്ടു. കേരളവാട്ടര് അതോറിറ്റി എംപ്ലോയീസ് സംഘ് (ബിഎംഎസ്) സംസ്ഥാന സമ്മേളനം ഉദ്ഘാടനം ചെയ്യുകയായിരുന്നു.
2019ല് ഭാരതത്തിലാകമാനം തുടക്കം കുറിച്ച പദ്ധതി ഏറെ വൈകിയാണ് സംസ്ഥാനത്ത് നടപ്പാക്കി തുടങ്ങിയത്. കേന്ദ്ര ജല് ജീവന് മിഷന്റെ കണക്കുകള് പ്രകാരം പദ്ധതി നടത്തിപ്പില് 26-ാമത് സ്ഥാനത്താണ് കേരളം. അഞ്ചു വര്ഷംകൊണ്ട് 50 ലക്ഷം പുതിയ പൈപ്പു കണക്ഷനുകള് നല്കി 70 ലക്ഷം വീടുകളില് കുടിവെള്ളം എത്തിക്കുകയായിരുന്നു ലക്ഷ്യം. ഇതിനകം 35 ലക്ഷം വീടുകളില് പൈപ്പ് കണക്ഷനുകള് എത്തിയെങ്കിലും കുടിവെള്ളസ്രോതസുകള് മെച്ചപ്പെടുത്താതെ പുതിയ കണക്ഷനുകള് നല്കിയതിനാല് കുടിവെള്ളക്ഷാമത്തില് ജനരോഷം ഉയരുകയാണ്. ഓരോ ദിവസവും ആയിരക്കണക്കിന് പേര് കണക്ഷന് ഉപേക്ഷിക്കുന്ന അവസ്ഥയിലാണ്. പദ്ധതിനടത്തിപ്പിലേക്കായി നിയമിച്ച താല്ക്കാലിക ജീവനക്കാരുടെ നിയമനം സംബന്ധിച്ച് ആക്ഷേപം ഉയര്ന്നതായും ഇതിനുവേണ്ടിമാത്രം കോടിക്കണക്കിന് രൂപ ചെലവഴിച്ചതായും കെ.കെ. വിജയകുമാര് പറഞ്ഞു.
ജല അതോറിറ്റിയെ സര്ക്കാര് വകുപ്പാക്കുക, പങ്കാളിത്ത പെന്ഷന് പിന്വലിക്കുക, ഡിഎ കുടിശിക അനുവദിക്കുക, കൂടുതല് തസ്തികകള് സൃഷ്ടിക്കുക, പെന്ഷന് ആനുകൂല്യങ്ങള് കൊടുക്കുക, പമ്പ് ഹൗസുകളിലെ ജീവനക്കാര്ക്ക് അടിസ്ഥാന സൗകര്യങ്ങള് ഉറപ്പാക്കുക, സ്ഥാനക്കയറ്റം നടപ്പാക്കുക, ലീവ് സറണ്ടര് പണമായി നല്കുക തുടങ്ങിയ ആവശ്യങ്ങള് സമ്മേളനം ഉന്നയിച്ചു. സ്വാഗത സംഘം ചെയര്മാന് സി.നാരായണന് അധ്യക്ഷത വഹിച്ചു.
എന്ജിഒ സംഘ് സംസ്ഥാന ജനറല് സെക്രട്ടറി എ. പ്രകാശ് മുഖ്യപ്രഭാഷണം നടത്തി. കെജിഒ സംഘ് സംസ്ഥാന സമിതിയംഗം പി.ആര്. സുനില്കുമാര്, പി.കെ. മധുസൂദനന്, പി. പ്രദീപ്, വി.ടി. രാജീവ്, മണികണ്ഠന് എന്നിവര് സംസാരിച്ചു. സമാപന സമ്മേളനം ബിഎംഎസ് സംഘടനാ സെക്രട്ടറി കെ. മഹേഷ് ഉദ്ഘാടനം ചെയ്തു.
ഭാരവാഹികളായി എം.പി. ചന്ദ്രശേഖരന് (പ്രസിഡന്റ്), വി.ടി.രാജീവ് (വര്ക്കിങ് പ്രസിഡന്റ്), സി. നാരായണന്, കെ.പി.മധുസൂദനന്, ആര്.സജി (വൈസ് പ്രസിഡന്റുമാര്), പി. പ്രദീപ് (ജനറല് സെക്രട്ടറി), വി.കെ. രജികുമാര്, അനില്കുമാര് കുനിയില്, ടി.ജി.നാനാജി (സെക്രട്ടറിമാര്), എന്.ഹരിനാരായണന് (ട്രഷറര്) എന്നിവരെ തെരഞ്ഞെടുത്തു.
