തൃശൂർ: ചിറക്കേക്കോട് ഗൃഹനാഥന്റെ ആക്രമണത്തിൽ പൊള്ളലേറ്റ മകനും പേരക്കുട്ടിയും മരിച്ചു. ചിറക്കേക്കോട് സ്വദേശി ജോജി (38), ഇദ്ദേഹത്തിന്റെ മകൻ ടെണ്ടുൽക്കർ(12) എന്നിവരാണ് മരിച്ചത്. ഗുരുതരമായി പൊള്ളലേറ്റ ജോജിയുടെ ഭാര്യ ലിജി (32) ആശുപത്രിയിൽ ചികിത്സയിലാണ്. ഇന്ന് പുലർച്ചെയാണ് സെക്യൂരിറ്റി ജീവനക്കാരനായ ജോൺസൺ വീട്ടിൽ വച്ച് മകനെയും കുടുംബത്തെയും പെട്രോൾ ഒഴിച്ച് തീ കത്തിച്ചത്. നാട്ടുകാരാണ് ഇവരെ ആശുപത്രിയിൽ എത്തിച്ചത്.
വ്യാഴാഴ്ച അർദ്ധപാത്രിയോടെയാണ് നാടിനെ നടുക്കിയ സംഭവം. കുടുംബ വഴക്കിനെ തുടർന്നാണ് ആക്രമണമെന്നാണ് പ്രാഥമിക നിഗമനം. ഭാര്യയെ മുറിയിൽ പൂട്ടിയിട്ട ശേഷമാണ് ജോൺസൺ മകനേയും കുടുംബത്തെയും തീ കൊളുത്തി കൊലപ്പെടുത്താൻ ശ്രമിച്ചത്. അച്ഛനും മകനും തമ്മിൽ വഴക്ക് പതിവാണെന്ന് പ്രദേശവാസികൾ പറയുന്നു. ഇവരെ തീകൊളുത്തിയതിന് പിന്നാലെ ജോൺസൺ വിഷം കഴിച്ച് ജീവനൊടുക്കാൻ ശ്രമിച്ചു.
മറ്റ് രണ്ടു പേരും നിലവിൽ എറണാകുളത്തെ സ്വകാര്യ ആശുപത്രിയിൽ ചികിത്സയിലാണ്. ഇവരുടെ നില ഗുരുതരമായി തുടരുകയാണ്. ജോൺസൺ അപകടനില തരണം ചെയ്തതായാണ് വിവരം.
