തിരുവനന്തപുരം: രാഷ്ട്രീയ സ്വയംസേവക സംഘത്തിന്റെ ആദര്ശദീപം നെഞ്ചിലേറ്റി രാജനൈതിക രംഗത്ത് പുത്തല് വഴിവെട്ടി തെളിയിച്ച കരുത്തുറ്റ സംഘാടകനായിരുന്നു പി.പി മുകുന്ദന് എന്ന് ദേശീയ നിര്വാഹക സമിതി അംഗം പി.കെ. കൃഷ്ണദാസ് പറഞ്ഞു.
സംഘത്തിന്റെ പ്രചാരകനായി മാതൃകാപരമായ പ്രവര്ത്തനം കാഴ്ചവച്ച പി.പി മുകുന്ദേട്ടന് 91 ല് ബി.ജെ.പിയുടെ സംഘടന സെക്രട്ടറിയായത് മുതല് കേരളത്തിന്റെ രാഷ്ട്രീയ മണ്ഡലത്തില് നിര്ണായ ശക്തിയായി മാറി.
ആദര്ശബോധവും സംഘടനാബോധവുമുള്ള ഒരു തലമുറയെ വാര്ത്തെടുത്ത് സംഘടനയുടെ രണ്ടാംനിര കരുപ്പിടിപ്പിയ്ക്കാന് ഏറെ ശ്രദ്ധേയമായ സംഭാവന പി.പി. മുകുന്ദേട്ടന് നല്കി.
രാഷ്ട്രീയത്തില് ശത്രുക്കളില്ലെന്നും പ്രതിയോഗികള് മാത്രമാണെന്നും നിലപാട് സ്വീകരിച്ച പി.പി മുകുന്ദേട്ടന് ഇതര രാഷ്ട്രീയ പ്രസ്ഥാനങ്ങളുമായി ആഴത്തിലുള്ള ബന്ധങ്ങള് സൂക്ഷിച്ചു. ജീവിതം സംഘടനയ്ക്കും സമാജത്തിനും സമര്പ്പിച്ച പി.പി മുകുന്ദേട്ടന്റെ ജീവിതം പുതുതലമുറ രാഷ്ട്രീയ നേതാക്കള്ക്ക് മാതൃകയാണ്.യോഗിവര്യന്റെ സാര്ഥക ജീവിതത്തിന് മുന്നില് പ്രണാമം അര്പ്പിക്കുന്നുവെന്നും അദേഹം പറഞ്ഞു.
