ന്യൂദല്ഹി: പൈതൃക കേന്ദ്രങ്ങളിലെ സന്ദര്ശകര്ക്കുളള സൗകര്യങ്ങള് മെച്ചപ്പെടുത്തുന്നതിനായി സാംസ്കാരിക സഹമന്ത്രി മീനാക്ഷി ലേഖി ന്യൂദല്ഹിയില് പൈതൃക കേന്ദ്രം ദത്തെടുക്കല് 2.0 പദ്ധതിക്ക് തുടക്കമിട്ടു. സ്വകാര്യ മേഖലയിലെ കമ്പനികള്, ട്രസ്റ്റ്, സര്ക്കാരിതര സംഘടനകള് എന്നിവയുമായി സഹകരിച്ച് ആര്ക്കിയോളജിക്കല് സര്വേ ഓഫ് ഇന്ത്യയാണ് പരിപാടി വിഭാവനം ചെയ്തത്.
രാജ്യത്തിന്റെ സമ്പന്നമായ സാംസ്കാരിക പൈതൃകം പ്രദര്ശിപ്പിക്കുന്ന രാജ്യത്തുടനീളമുളള മൂവായിരത്തി 697 സംരക്ഷിത സ്മാരകങ്ങളിലെ സൗകര്യങ്ങള് വര്ധിപ്പിക്കുന്നതില് കോര്പ്പറേറ്റ് പങ്കാളികളെയും ഉള്പ്പെടുത്താന് പദ്ധതി ലക്ഷ്യമിടുന്നു. കോര്പ്പറേറ്റ് കമ്പനികളുടെ സാമൂഹ്യ സുരക്ഷാ ഉത്തരവാദിത്ത ഫണ്ട് ഉപയോഗപ്പെടുത്തി പൈതൃക കേന്ദ്രങ്ങളിലെ സൗകര്യങ്ങള് വര്ദ്ധിപ്പിക്കുകയാണ് ലക്ഷ്യം.
ഇന്ത്യയുടെ പൗരാണിക പൈതൃകം സമ്പന്നമാക്കുന്നതിന് 2014ന് ശേഷം പ്രധാനമന്ത്രി നരേന്ദ്ര മോദി നിരവധി നടപടികള് സ്വീകരിച്ചിട്ടുണ്ടെന്ന് വീഡിയോ കോണ്ഫറന്സിംഗിലൂടെ സമ്മേളനത്തെ അഭിസംബോധന ചെയ്ത കേന്ദ്ര സാംസ്കാരിക മന്ത്രി ജി കിഷന് റെഡ്ഡി പറഞ്ഞു. രാജ്യത്തിന്റെ വികസനത്തിനൊപ്പം പൈതൃക സംരക്ഷണവും ആവശ്യമാണെന്നും അദ്ദേഹം പറഞ്ഞു.
പൈതൃക കേന്ദ്രം ദത്തെടുക്കല് 2.0 പദ്ധതിയിലൂടെ ഇന്ത്യയുടെ ചരിത്ര പൈതൃകം വരും തലമുറകള്ക്കായി സംരക്ഷിക്കപ്പെടുമെന്ന് ചടങ്ങില് സംസാരിച്ച മന്ത്രി മീനാക്ഷി ലേഖി പറഞ്ഞു. രാജ്യത്തിന്റെ പൈതൃകവും സംസ്കാരവും സംരക്ഷിക്കേണ്ടതിന്റെ ആവശ്യകത അവര് ഊന്നിപ്പറഞ്ഞു. സാമൂഹ്യ സുരക്ഷാ ഉത്തരവാദിത്ത ഫണ്ട് വഴി പൈതൃക കേന്ദ്രങ്ങളില് 0.7 ശതമാനം പ്രവൃത്തികള് മാത്രമാണ് നിലവില് നടക്കുന്നതെന്ന് മീനാക്ഷി ലേഖി പറഞ്ഞു.
