ആലപ്പുഴ: കോണ്ഗ്രസ് നേതാവ് കെ.സി. വേണുഗോപാൽ എം.പി.യുടെ വീട്ടിൽ മോഷണം. ആലപ്പുഴയിലെ കൈതവന വാർഡിലെ ഔദ്യോഗിക ഓഫീസായി പ്രവർത്തിക്കുന്ന വീട്ടിലാണ് വ്യാഴാഴ്ച രാത്രിമോഷണം നടന്നത്. ലെറ്റർപാഡ്, ചെക്ക്ലീഫുകൾ, വാച്ചുകൾ, ഫയലുകൾ എന്നിവ മോഷണം പോയിട്ടുണ്ട്.
സംഭവ ദിവസം രാത്രി 11.30 വരെ സ്റ്റാഫംഗം അജ്മലും യൂത്ത് കോൺഗ്രസ് അമ്പലപ്പുഴ ബ്ലോക്ക് പ്രസിഡന്റ് നൂറുദ്ദീൻ കോയയും വീട്ടിലുണ്ടായിരുന്നു. ഇവർ പോയശേഷമാണ് മോഷണം നടന്നത്. വീടിന്റെ പിൻഭാഗത്തെ ജനൽക്കമ്പികൾ ഇളക്കിമാറ്റിയാണ് മോഷ്ടാക്കൾ അകത്തുകടന്നതെന്നാണ് സ്റ്റാഫംഗങ്ങൾ പറയുന്നത്.തുടർന്ന് അടുത്ത ദിവസം രാവിലെ പതിനൊന്നോടെ അജ്മൽ എത്തിയപ്പോഴാണു മോഷണ വിവരമറിയുന്നത്.
സംഭവം അറിഞ്ഞ് പോലീസും വിരലടയാള വിദഗ്ധരും ഡോഗ്സ്ക്വാഡും സ്ഥലത്തെത്തി പരിശോധന നടത്തി. മണംപിടിച്ച പോലീസ് നായ കളർകോട് ഭാഗത്തേക്ക് ഓടി. വേണുഗോപാലിന്റെ വസതിയ്ക്ക് തൊട്ടടുത്തുള്ള വീടുകളില് ഈയിടെ മോഷണം നടന്നിരുന്നുവെങ്കിലും മോഷ്ടാക്കളെ പിടികൂടാന് കഴിഞ്ഞിട്ടില്ല.
