ഇന്‍ഡോര്‍: വളര്‍ത്തുനായ്‌ക്കള്‍ തമ്മിലുള്ള പോര് ഉടമകള്‍ തമ്മിലുള്ള തര്‍ക്കത്തിലും തുടര്‍ന്ന് വെടിവയ്‌പ്പിലും കലാശിച്ചു. ഇന്‍ഡോറില്‍ നടന്ന ദാരുണസംഭവത്തില്‍ രണ്ട് പേര്‍ മരിച്ചു. ബാങ്കിലെ സെക്യൂരിറ്റി ഗാര്‍ഡായി ജോലി ചെയ്യുന്ന രാജ്പാല്‍ സിംഗ് രജാവത്ത് ഇന്നലെ രാത്രി തന്റെ ബാല്‍ക്കണിയില്‍ നിന്ന് അയല്‍വാസികള്‍ക്ക് നേരെ വെടിയുതിര്‍ത്തതില്‍ രണ്ട് പേര്‍ കൊല്ലപ്പെടുകയും ആറ് പേര്‍ക്ക് പരിക്കേല്‍ക്കുകയും ചെയ്തു.
രജാവത്തും അയല്‍വാസിയായ വിമല്‍ അചലയും രാത്രി 11 മണിയോടെ കൃഷ്ണാബാഗ് കോളനിയിലെ ഇടുങ്ങിയ പാതയിലൂടെ നായ്‌ക്കളുമായി പോകുന്നതിനിടെ ഒരു നായ്‌ക്കളും തമ്മില്‍ കടിപിടയായി. ഇതേച്ചൊല്ലി ഇരുവരും തമ്മില്‍ തര്‍ക്കത്തിലായി. തുടര്‍ന്ന് രജാവത്ത് തന്റെ ഒന്നാം നിലയിലെ വീട്ടിലേക്ക് ഓടിക്കയറി 12-ബോര്‍ റൈഫിള്‍ ഉപയോഗിച്ച് അചലയ്‌ക്ക് നേരെ വെടിയുതിര്‍ക്കുകയായിരുന്നു.
ഭയാനകമായ വെടിവയ്‌പ്പിന്റെ വീഡിയോ സോഷ്യല്‍മീഡിയയില്‍ പ്രചരിച്ചു. താഴെക്ക് വെടിവയ്‌ക്കും മുന്‍പ് രജാവത്ത് മുകളിലേക്ക് വെടിവച്ച് മുന്നറിയിപ്പ് നല്‍കുന്നുണ്ട്. നഗരത്തിലെ നിപാനിയ മേഖലയില്‍ ഹെയര്‍ സലൂണ്‍ നടത്തിയിരുന്ന അചലയും അയല്‍വാസിയായ 27 കാരനായ രാഹുല്‍ വര്‍മയുമാണ് മരിച്ചത്. ഇരുവരെയും ഉടന്‍ തന്നെ അടുത്തുള്ള ആശുപത്രിയില്‍ എത്തിച്ചെങ്കിലും മരണം സ്ഥിരീകരിക്കുകയായിരുന്നു.
സംഭവത്തില്‍ രജാവത്ത്, മകന്‍ സുധീര്‍, മറ്റൊരു ബന്ധു ശുഭം എന്നിവര്‍ അറസ്റ്റിലായ. രജാവത്തിനതിരേ കൊലക്കുറ്റത്തിന് കേസെടുത്തു. ഗ്വാളിയോര്‍ സ്വദേശിയായ രജാവതിനെ ഇന്‍ഡോറിലെ ഒരു സ്വകാര്യ സ്ഥാപനം സെക്യൂരിറ്റി ഗാര്‍ഡായി നിയമിച്ചത് ലൈസന്‍സുള്ള 12-ബോര്‍ റൈഫിള്‍ ഉള്ളതിനാലാണെന്നാണ് റിപ്പോര്‍ട്ട്.
VIDEO | Two people were killed and six others injured after a man, identified as a security guard Rajpal Rajawat, fired shots on neighbours following an argument over pet dogs in MP's Indore.
(Note: Audio muted due to abusive content)
(Source: Third Party) pic.twitter.com/jw8Btu9GVN
— Press Trust of India (@PTI_News) August 18, 2023
ജന്മഭൂമി ഓണ്‍ലൈന്‍