എറണാകുളം: എറണാകുളം മഹാരാജാസ് കോളേജിലെ വിദ്യാര്‍ത്ഥികള്‍ തന്റെ ക്ലാസില്‍ അലക്ഷ്യമായി പെരുമാറിയത് വേദനിപ്പിച്ചെന്ന് അപമാനിക്കെപ്പെട്ട അധ്യാപകന്‍ ഡോക്ടര്‍ പ്രിയേഷ്. കാഴ്ചപരിമിതി ഉള്ളതുകൊണ്ടാണല്ലോ കുട്ടികള്‍ ഇങ്ങനെ ചെയ്തത്.
മറ്റു അധ്യാപകരുടെ ക്ലാസുകളില്‍ ഇങ്ങനെ ചെയ്യില്ലായിരുന്നു. കുട്ടികള്‍ തെറ്റു മനസ്സിലാക്കുന്നതിനാണ് പരാതി നല്‍കിയതെന്നും പ്രിയേഷ് പറഞ്ഞു.
അധ്യാപകനെ അപമാനിച്ച സംഭവത്തില്‍ ആറ് വിദ്യാര്‍ത്ഥികളെ സസ്പെന്ഡ് ചെയ്തു. കെഎസ്യു യൂണിറ്റ് വൈസ് പ്രസിഡന്റ് ഫാസിലിനെ അടക്കമാണ് സസ്പെന്ഡ് ചെയ്തത്. പൊളിറ്റിക്കല്‍ സയന്‍സ് അധ്യാപകന്‍ പ്രിയേഷിനെയാണ് വിദ്യാര്‍ത്ഥികള്‍ അപമാനിച്ചത്. ക്ലാസ് നടക്കവെ കളിച്ചും ചിരിച്ചും മൊബൈല്‍ ഫോണില്‍ മുഴുകിയും അനുവാദമില്ലാതെ പ്രവേശിക്കുകയും പുറത്തുപോവുകയും ചെയ്യുന്ന വിദ്യാര്‍ത്ഥികളുടെ ദൃശ്യങ്ങളാണ് പുറത്തുവന്നത്.
