തിരുവനന്തപുരം: സഹകരണ മേഖലയില്‍ നടക്കുന്ന അഴിമതിക്കെതിരെ സംസ്ഥാനത്ത് ബിജെപി നടത്തുന്ന സമരങ്ങളുടെ ഭാഗമായി തിരുവനന്തപുരം മാറനല്ലൂരില്‍ ബിജെപി സഹകരണ അദാലത്ത് നടത്തി. കണ്ടല സര്‍വ്വീസ് സഹകരണ ബാങ്കിലെ നിക്ഷേപക തട്ടിപ്പിനെതിരെ തൂങ്ങാംപാറ വിശ്വമ്പര ആഡിറ്റോറിയത്തില്‍ നടന്ന അദാലത്ത് ബിജെപി സംസ്ഥാന അദ്ധ്യക്ഷന്‍ കെ.സുരേന്ദ്രന്‍ ഉദ്ഘാടനം ചെയ്തു.
യുഡിഎഫിനും എല്‍ഡിഎഫിനും തടിച്ച് കൊഴുക്കുവാനുള്ള വെള്ളാനയായി സഹകരണ മേഖല മാറിയെന്ന് അദ്ദേഹം പറഞ്ഞു. ഇടതു വലത് മുന്നണികള്‍ക്ക് അഴിമതിക്കുള്ള മാര്‍ഗം മാത്രമാണ് സഹകരണ മേഖല. പാവപ്പെട്ടവരാണ് ഈ രാഷ്‌ട്രീയക്കാരുടെ തട്ടിപ്പിന് ഇരയാവുന്നത്. ചെറുകിട സഹകാരികളെയെല്ലാം വഞ്ചിച്ച ഇക്കൂട്ടര്‍ സഹകരണ രംഗത്തെ ഭീമന്മാര്‍ക്ക് അഴിമതി നടത്താനുള്ള അവസരം സൃഷ്ടിച്ചു കൊടുക്കുകയാണ് ചെയ്യുന്നത്.
കേന്ദ്രസര്‍ക്കാര്‍ നോട്ട് നിരോധിച്ചപ്പോള്‍ മുഖ്യമന്ത്രി രാജ്ഭവന് മുമ്പില്‍ നടത്തിയ സമരത്തില്‍ പറഞ്ഞത് മോദി സര്‍ക്കാര്‍ സഹകരണ മേഖലയെ തകര്‍ക്കുന്നുവെന്നാണ്. എന്നാല്‍ സഹകരണ മേഖലയെ കാര്‍ന്ന് തിന്നാന്‍ ശ്രമിക്കുന്നവരെ നിലയ്‌ക്ക് നിര്‍ത്താനും സുതാര്യമാക്കാനുമാണ് മോദി സര്‍ക്കാര്‍ ശ്രമിച്ചതെന്ന് ഇപ്പോള്‍ വ്യക്തമായിരിക്കുകയാണ്. കള്ളപ്പണ ഇടപാടുകളും തട്ടിപ്പും തടയാനുള്ള കേന്ദ്രനീക്കത്തിനെതിരെ കോണ്‍ഗ്രസ് സിപിഎം മുന്നണികള്‍ രംഗത്തിറങ്ങിയത് അഴിമതിക്കാരെ സംരക്ഷിക്കാനാണ്.
കെവൈസി നടപ്പിലാക്കാന്‍ അനുവദിക്കില്ലെന്ന അവരുടെ പ്രഖ്യാപനം കള്ളപ്പണ ഇടപാട് ഇഷ്ടം പോലെ നടത്താനായിരുന്നു. സഹകരണ മേഖലയില്‍ പൊതു സോഫ്റ്റ് വെയര്‍ കൊണ്ടുവരാനുള്ള മോദി സര്‍ക്കാരിന്റെ തീരുമാനത്തെ കേരളം മാത്രമാണ് എതിര്‍ത്തത്. അഴിമതി നടത്താന്‍ സാധിക്കാതെ വരുമെന്ന് അറിയാവുന്നത് കൊണ്ടാണ് സംസ്ഥാന സര്‍ക്കാര്‍ ഇതിനെ എതിര്‍ത്തത്. ഇതോടെ സംസ്ഥാനത്തെ ലക്ഷക്കണക്കിന് സഹകാരികള്‍ക്കും കര്‍ഷകര്‍ക്കും കേന്ദ്ര ആനുകൂല്ല്യങ്ങള്‍ ലഭിക്കാതെയായി. പാവപ്പെട്ടവരെ വഞ്ചിച്ച് വന്‍കിടക്കാരെ അഴിമതി നടത്താന്‍ സഹായിക്കുന്ന സര്‍ക്കാരും പ്രതിപക്ഷവുമാണ് കേരളത്തിലുള്ളതെന്നും അദ്ദേഹം പറഞ്ഞു.
കണ്ടല സര്‍വ്വീസ് സഹകരണ ബാങ്കില്‍ നടന്ന നിക്ഷേപക തട്ടിപ്പിനെതിരെ ബിജെപി സംഘടിപ്പിച്ച സഹകരണ അദാലത്തില്‍ പരാതികളുടെ പ്രളയം. ബാങ്കില്‍ നിന്ന് പണം നഷ്ടപ്പെട്ടവരും പണം തിരികെ ലഭിക്കാന്‍ കാലതാമസം നേരിടുന്നവരുടെയും അടക്കം നൂറുകണക്കിന് പരാതികളാണ് അദാലത്തില്‍ ലഭിച്ചത്. ബിജെ പി സംസ്ഥാന പ്രസിഡന്റ് കെ. സുരേന്ദ്രന്‍, ദേശീയ നിര്‍വാഹകസമിതി അംഗം പികെ കൃഷ്ണദാസ്, ജില്ലാ അദ്ധ്യക്ഷന്‍ വിവി രാജേഷ്, സഹകരണ മേഖലയിലെ വിദഗ്‌ദ്ധന്മാര്‍, അഭിഭാഷകര്‍ എന്നിവര്‍ പരിപാടിക്ക് നേതൃത്വം നല്‍കി.
പ്രതികരിക്കാൻ ഇവിടെ എഴുതുക: