ബിഗ് ബോസ് ഒ ടി ടി 2ല്‍ കുടുംബവാരത്തോടനുബന്ധിച്ച് സംവിധായകന്‍ മഹേഷ് ഭട്ട് കടന്നുവരുമ്പോള്‍ മകളും നടിയും സംവിധായികയുമായ പൂജ ഭട്ട് അവിടെയുണ്ടായിരുന്നു.ഈ വേളയില്‍ വൈകാരിക രംഗങ്ങള്‍ക്കും കാണികള്‍ സാക്ഷ്യം വഹിച്ചു.
പൂജ ജനിക്കുമ്പോള്‍ തനിക്ക് 23 വയസായിരുന്നു പ്രായമെന്ന് മഹേഷ് ഭട്ട് വെളിപ്പെടുത്തി.അന്ന് ധനികനായിരുന്നില്ല. ആശുപത്രിയില്‍ നല്‍കേണ്ട 1200 രൂപയും കൈവശമുണ്ടായിരുന്നില്ല.ഈ തുക എങ്ങനെ സമാഹരിക്കുമെന്ന് ആശങ്കയുണ്ടായിരുന്നു. തനിക്ക് 16 വയസുള്ളപ്പോള്‍ സ്‌കൂളില്‍ പഠിക്കവെയാണ് പൂജയുടെ അമ്മയെ കാണുന്നത്.
കുടുംബത്തെ നന്നായി നോക്കാന്‍ ആവശ്യമായ പണം കൈവശം ഇല്ലാതിരുന്ന കാലം മഹേഷ് ഭട്ട് അനുസ്മരിച്ചു.സിനിമകള്‍ വിജയിക്കാത്ത കാലമുണ്ടായിരുന്നു. അന്ന് കുടുംബം പോറ്റാന്‍ മോഡലിംഗിലേക്ക് ചുവടുവെച്ചത് പൂജയായിരുന്നു. നിരവധി പരസ്യങ്ങള്‍ക്കായി ഓഡിഷന്‍ ചെയ്തു. അന്ന് അത് വലിയ ആശ്വാസമായിരുന്നു. ഇത് പറയുമ്പോള്‍ പിതാവിന്റെയും മകളുടെയും കണ്ണുകള്‍ നിറഞ്ഞൊഴുകുകയായിരുന്നു.
മദ്യപാന ശീലം ഉപേക്ഷിച്ചത് മകള്‍ ഷഹീന്‍ ഭട്ടിന്റെ ജനനത്തോടെയാണ്. ഷഹീന്‍ തന്നെ അവഗണിക്കുന്നത് കണ്ടപ്പോഴാണ് മദ്യം ഉപേക്ഷിച്ചെന്നും കഴിഞ്ഞ 36 വര്‍ഷമായി മദ്യം തൊട്ടിട്ടില്ലെന്നും മഹേഷ് ഭട്ട് വെളിപ്പെടുത്തി.
ബിഗ് ബോസ് ഷോയില്‍ പൂജയെ നിരന്തരം നിരീക്ഷിക്കുന്നുണ്ടെന്നും മഹേഷ് ഭട്ട് പറഞ്ഞു. അമ്മയെയും സഹോദരങ്ങളെയും കുറിച്ച് പൂജ ചോദിച്ചപ്പോള്‍ നിങ്ങളുടെ അമ്മ ഷോ വളരെ ആവേശത്തോടെയാണ് കാണുന്നതെന്ന് മഹേഷ് ഭട്ട് വെളിപ്പെടുത്തി.സഹോദരങ്ങളും ഇങ്ങനെ തന്നെ.
