നെടുമങ്ങാട്. കരമന ആറ്റിൽ, അരുവിക്കര കുമ്മി പമ്പ് ഹൗസിന് സമീപം ആറ്റിൽ കുളിക്കാൻ ഇറങ്ങിയ ആറ് അംഗ സംഘത്തിലെ ഒരു യുവാവ് മുങ്ങി മരിച്ചു.
കരകുളം ഏണിക്കര നെടുമ്പാറ സജി നിവാസിൽ റോബർട്ട്, സിന്ധു ദമ്പതികളുടെ മകൻ സജിത്ത് റോബർട്ട് (21) ആണ് മരിച്ചത്. ഈ ദമ്പതികളുടെ 2 മക്കളിൽ ഇളയവനായ സജിത്ത് ഇലക്ട്രീഷ്യൻ പണിക്കാരൻ ആയിരുന്നു. ഇന്നലെ ഉച്ച തിരിഞ്ഞ് ആയിരുന്നു ഈ സംഘം ആറ്റിൽ കുളിക്കാൻ ഇറങ്ങിയത്. സജിത്ത് മുങ്ങി താന്നപ്പോൾ, ഒപ്പം ഉള്ളവർ രക്ഷിക്കാൻ നടത്തിയ ശ്രമം വിഫലമായതോടെ അഗ്നി രക്ഷ സേനയെ വിവരം അറിയിക്കുക ആയിരുന്നു.
നെടുമങ്ങാട്ട് നിന്നും സ്റ്റേഷൻ ഓഫിസർ കെ.എൻ.ഷാജിയുടെ നേതൃത്വത്തിൽ എത്തിയ അഗ്നി രക്ഷ സേന അംഗങ്ങളും നാട്ടുകാരും ചേർന്ന് ആയിരുന്നു 4.30യോടെ മൃതദേഹം കണ്ടെത്തി കരയ്ക്ക് എടുത്തത്. ഇതിനകം അരുവിക്കര പൊലീസും സ്ഥലത്ത് എത്തിയിരുന്നു. മൃതദേഹം മെഡിക്കൽ കോളജ് ആശുപത്രി മോർച്ചറിയിലേക്ക് മാറ്റി. പോസ്റ്റ് മോർട്ടത്തിന് ശേഷം മൃതദേഹം ഇന്ന് ബന്ധുക്കൾക്ക് വിട്ട് കൊടുക്കും. ഏക സഹോദരൻ സജിൻ റോബർട്ട്.
