കോട്ടയം: പാചകവാതക സിലണ്ടര്‍ കയറ്റിവന്ന ലോറി പനച്ചിക്കാട് സരസ്വതി ക്ഷേത്ര ഗോപുരത്തിലേക്ക് ഇടിച്ചുകയറി. കാലി സിലണ്ടറുമായി വഴിതെറ്റിയെത്തിയ ലോറിയാണ് ക്ഷേത്രത്തിന്റെ പ്രധാന ഗോപുരത്തിലേക്ക് ഇടിച്ചുകയറിയത്. ബുധനാഴ്ച ഉച്ചയ്‌ക്ക് ഒരു മണിയോടെയാണ് സംഭവം. ലോറിയുടെ ബ്രേക്ക് നഷ്ടമായതാണ് അപകടത്തിന് കാരണം. ആര്‍ക്കും പരിക്കില്ല.
തിരുവനന്തപുരം ബാലരാമപുരം സ്വദേശിയായ അനൂപാണ് ലോറി ഓടിച്ചിരുന്നത്. എറണാകുളത്തെ പ്ലാന്റിലേക്ക് സിലണ്ടറുകള്‍ നിറക്കുന്നതിനായി തിരുവനന്തപുരത്തു നിന്നും വരുമ്പോഴാണ് അപകടം. ക്ഷേത്രം റോഡിലേക്ക് വഴിതെറ്റി വന്ന വാഹനം പുറകോട്ട് തിരിഞ്ഞ് പോകുന്നതിനായി തിരിക്കവേ പെട്ടെന്ന് നിയന്ത്രണം നഷ്ടപ്പെടുകയായിരുന്നു. ലോറിയുടെ മുന്‍ഭാഗവും, ക്ഷേത്രത്തിന്റെ കവാടത്തിലെ ഭണ്ഡാരം അടക്കം തകര്‍ന്നിട്ടുണ്ട്. ചിങ്ങവനം പോലീസ് മേല്‍നടപടി സ്വീകരിച്ചു.
