തിരുവനന്തപുരം : ഉമ്മന്‍ചാണ്ടിയോളം രാഷ്ട്രീയ എതിരാളികളാല്‍ വേട്ടയാടപ്പെട്ട മറ്റൊരു നേതാവില്ലെന്ന് കെ പി സി സി അധ്യക്ഷന്‍ കെ സുധാകരന്‍. ജനങ്ങള്‍ക്ക് ഒരുപോലെ സ്വീകാര്യനായ നേതാവ് ആയിരുന്നു ഉമ്മന്‍ചാണ്ടി.
കെ പി സി സി സംഘടിപ്പിച്ച ഉമ്മന്‍ചാണ്ടി അനുസ്മരണ പരിപാടിയില്‍ സംസാരിക്കുകയായിരുന്നു കെ സുധാകരന്‍.
ഉമ്മന്‍ചാണ്ടിയുടെ പ്രത്യേകത മതേതര മുഖമുദ്ര ആയിരുന്നു.ഏറ്റെടുത്ത പദവികളെക്കാള്‍ അധികവും മറ്റുള്ളവര്‍ക്ക് വിട്ടു നല്‍കിയ നേതാവ് ആയിരുന്നു ഉമ്മന്‍ചാണ്ടിയെന്നും സുധാകരന്‍ പറഞ്ഞു.വെറുപ്പിന്റെ പ്രചാരകരെ സ്നേഹം കൊണ്ടാണ് ഉമ്മന്‍ ചാണ്ടി നേരിട്ടത്. ജനപ്രതിനിധിയെക്കുറിച്ചുള്ള പരമ്പരാഗത സങ്കല്‍പ്പങ്ങളെല്ലാം അദ്ദേഹം തിരുത്തി.ഏതൊരു പൊതുപ്രവര്‍ത്തകന്റെയും ലക്ഷ്യം ഉമ്മന്‍ചാണ്ടിയാവുക എന്നത് ആയിരിക്കണമെന്നും സുധാകരന്‍ പറഞ്ഞു.
ഉമ്മന്‍ചാണ്ടി അനുസ്മരണ പരിപാടിയില്‍ കെ പി സി സിയുടെ ക്ഷണപ്രകാരം മുഖ്യമന്ത്രി പിണറായി വിജയനും പങ്കെടുത്തു.
ഉമ്മന്‍ചാണ്ടിയുടെ മരണം കോണ്‍ഗ്രസിനും യുഡിഎഫിനും നികത്താനാകാത്ത നഷ്ടമാണെന്ന് മുഖ്യമന്ത്രി പറഞ്ഞു.
സംസ്ഥാനത്തെ പ്രധാനപ്പെട്ട നിരവധി വകുപ്പുകള്‍ മികച്ച രീതിയില്‍ തന്നെ കൈകാര്യം ചെയ്തിരുന്നു ഉമ്മന്‍ചാണ്ടി.ആ വിപുലമായ അനുഭവ പരിജ്ഞാനം രണ്ട് തവണ മുഖ്യമന്ത്രിയായ ഘട്ടത്തില്‍ അദ്ദേഹത്തിന് ശക്തിപകര്‍ന്നിട്ടുണ്ട്. കോണ്‍ഗ്രസില്‍ അദ്ദേഹത്തിനുണ്ടായ സ്വീകാര്യത അദ്ദേഹത്തിന്റെ നേതൃശേഷിയുടെ പ്രത്യേകത തന്നെയായിരുന്നുവെന്നും പിണറായി പറഞ്ഞു.
പ്രതികരിക്കാൻ ഇവിടെ എഴുതുക: