പുതുക്കാട്: വിദേശ പൗരത്വമുള്ള കല്ലൂര്‍ സ്വദേശിയെ വീടുകയറി അക്രമിച്ച് കവര്‍ച്ച നടത്തിയ അഞ്ചംഗ സംഘത്തെ പുതുക്കാട് പോലീസ് അറസ്റ്റ് ചെയ്തു. ചിറ്റിശ്ശേരി സ്വദേശികളായ കുട്ടേപ്പറമ്പില്‍ ആഷിക് (24), ആലുക്ക സ്റ്റീവോ (24), കുഴുപ്പുള്ളി കാര്‍ത്തിക്ക് (18), ചൊവ്വൂര്‍ സ്വദേശി നെടുങ്കാട്ടില്‍ മിഥുന്‍ (24), പാലയ്‌ക്കല്‍ സ്വദേശി വെളിയത്ത് ശരത്ത് (24) എന്നിവരാണ് അറസ്റ്റിലായത്.
കല്ലൂര്‍ മാവിന്‍ചുവടില്‍ തനിച്ച് താമസിക്കുന്ന യുഎസ് പൗരത്വമുള്ള 65 വയസുള്ള ഓസ്റ്റിന്‍ തോമസിനെ ആക്രമിച്ചാണ് സംഘം പണവും, സ്വര്‍ണവും മൊബൈല്‍ ഫോണും കവര്‍ന്നത്. കഴിഞ്ഞ ബുധനാഴ്ച രാത്രിയാണ് കേസിനാസ്പദമായ സംഭവം. മറ്റൊരു പേരില്‍ വ്യാജ ഫേസ്ബുക്ക് അക്കൗണ്ടുണ്ടാക്കി പ്രതികളിലൊരാളായ ആഷിക് ഓസ്റ്റിനുമായി സൗഹൃദത്തിലാവുകയായിരുന്നു. പലതവണ ഓസ്റ്റിനില്‍ നിന്ന് ഇയാള്‍ പണം വാങ്ങിയതായും പറയുന്നു. സംഭവ ദിവസം രാത്രി ആഷിക് നാല് സുഹൃത്തുക്കളുമായി എത്തി ഓസ്റ്റിനോട് പണം ചോദിച്ചതോടെ ഇവര്‍ തമ്മില്‍ തര്‍ക്കം നടന്നിരുന്നു. ഇതിനിടെ ഓസ്റ്റിനെ ആക്രമിച്ച് സംഘം പണവും സ്വര്‍ണവുമായി കടന്നുകളയുകയായിരുന്നു.
മൊബൈല്‍ ഫോണ്‍ കേന്ദ്രീകരിച്ച് നടത്തിയ അന്വേഷണത്തിലാണ് അന്യസംസ്ഥാനത്തേക്ക് കടക്കാനുള്ള ശ്രമത്തിനിടെ പ്രതികള്‍ പിടിയിലായത്. കവര്‍ച്ച മുതലുകള്‍ പോലീസ് കണ്ടെടുത്തു. ചാലക്കുടി ഡിവൈഎസ്പി ടി.എസ്. സിനോജ്, പുതുക്കാട് എസ്എച്ച്ഒ യു.എച്ച്. സുനില്‍ദാസ്, എസ്‌ഐമാരായ കെ.എസ്. സൂരജ്, സുധീഷ്, ലിജോ എന്നിവരടങ്ങിയ സംഘമാണ് പ്രതികളെ അറസ്റ്റ് ചെയ്തത്.
പ്രതികരിക്കാൻ ഇവിടെ എഴുതുക: