പോര്ട്ട് ബ്ലെയര്: ആന്ഡമാന് നിക്കോബാര് ദ്വീപിലെ പോര്ട്ട് ബ്ലെയര് വീര സവര്ക്കര് അന്താരാഷ്ട്ര വിമാനത്താവളത്തിന്റെ പുതിയ സംയോജിത ടെര്മിനല് കെട്ടിടം വീഡിയോ കോണ്ഫറന്സിങ്ങിലൂടെ പ്രധാനമന്ത്രി നരേന്ദ്ര മോദി ഉദ്ഘാടനം ചെയ്തു. 710 കോടി രൂപ മുടക്കി നിര്മിച്ച പുതിയ ടെര്മിനല് കെട്ടിടത്തിന് പ്രതിവര്ഷം 50 ലക്ഷം യാത്രക്കാരെ കൈകാര്യം ചെയ്യാന് കഴിയും. ആന്ഡമാന് സന്ദര്ശിക്കാന് ആഗ്രഹിക്കുന്നവര് കൂടുതല് ശേഷിയുള്ള വിമാനത്താവളം വേണമെന്ന് ആവശ്യമുയര്ന്നിരുന്നു. അതാണ് യാഥാര്ത്ഥ്യമായതെന്ന് പ്രധാനമന്ത്രി പറഞ്ഞു.
നിലവിലുള്ള ടെര്മിനലിന് 4,000 സഞ്ചാരികളെ കൈകാര്യം ചെയ്യാന് സാധിച്ചിരുന്നിടത്ത് പുതിയ ടെര്മിനലിന് 11,000 പേര്ക്കുള്ള സൗകര്യമുണ്ടാകും. പത്തു വിമാനങ്ങള്ക്ക് പാര്ക്ക് ചെയ്യാനാകും. കൂടുതല് വിമാനങ്ങളും വിനോദസഞ്ചാരികളും ഈ മേഖലയിലേക്ക് കൂടുതല് തൊഴിലവസരങ്ങള് കൊണ്ടുവരുമെന്നും പ്രധാനമന്ത്രി പറഞ്ഞു.
വളരെക്കാലമായി ഇന്ത്യയില് വികസനാവസരങ്ങള് വന് നഗരങ്ങളില് മാത്രമായി പരിമിതപ്പെടുത്തിയിരുന്നു. കഴിഞ്ഞ ഒന്പതുവര്ഷത്തിനിടയില് രാജ്യത്തെ വനവാസി, ദ്വീപ് മേഖലകള് വികസന കുതിപ്പിലാണ്. എല്ലാവര്ക്കും ഒപ്പം എല്ലാവരുടെയും വികസനം (സബ്കാ സാത്ത്, സബ്കാ വികാസ്) എന്നതിന്റെ മാതൃകയാണിതെന്നും പ്രധാനമന്ത്രി പറഞ്ഞു. ആന്ഡമാനില് വികസനത്തിന്റെ പുതിയ ഗാഥ രചിക്കുന്നു. കഴിഞ്ഞ ഒമ്പത് വര്ഷങ്ങളില് ഏകദേശം 48,000 കോടി രൂപയാണ് ബജറ്റിലൂടെ ആന്ഡമാന് നിക്കോബാറിനായി അനുവദിച്ചത്. വീടുകളിലെ പൈപ്പ് വെള്ള കണക്ഷന് 50,000 ആയി. ആന്ഡമാന് നിക്കോബാറില് എല്ലാവര്ക്കും ബാങ്ക് അക്കൗണ്ടും ഒരു രാജ്യം ഒരു റേഷന് കാര്ഡ് സൗകര്യവുമുണ്ട്.
വികസനവും പൈതൃകവും കൈകോര്ത്ത് മുന്നേറുന്നുവെന്ന മഹാമന്ത്രത്തിന്റെ ജീവനുള്ളതും ശ്വസിക്കുന്നതുമായ ഉദാഹരണമായി ആന്ഡമാന് മാറുകയാണ്. ചെങ്കോട്ടയില് ഉയര്ത്തുന്നതിന് മുമ്പ് ത്രിവര്ണ്ണ പതാക ആന്ഡമാനില് ഉയര്ത്തിയെങ്കിലും ഒരാള്ക്ക് ദ്വീപില് അടിമത്തത്തിന്റെ അടയാളങ്ങള് മാത്രമേ കണ്ടെത്താന് കഴിയുമായിരുന്നുള്ളൂവെന്ന് പ്രധാനമന്ത്രി ചൂണ്ടിക്കാട്ടി. ഒരിക്കല് നേതാജി സുഭാഷ് ചന്ദ്രബോസ് ത്രിവര്ണ്ണ പതാക ഉയര്ത്തിയ അതേ സ്ഥലത്ത് തന്നെ ദേശീയപതാക ഉയര്ത്താന് അവസരം ലഭിച്ചതില് അദ്ദേഹം നന്ദി രേഖപ്പെടുത്തി.
രാജ്യത്തിന്റെ വികസനത്തിനായി സ്വയം സമര്പ്പിക്കേണ്ടതിന്റെ ആവശ്യകതയെക്കുറിച്ചും മോദി ഊന്നിപ്പറഞ്ഞു. ആന്ഡമാന് നിക്കോബാര് ദ്വീപുകളില് നടക്കുന്ന വികസന പ്രവര്ത്തനങ്ങള് മുഴുവന് മേഖലയെയും കൂടുതല് ശക്തിപ്പെടുത്തുമെന്ന ആത്മവിശ്വാസവും പ്രധാനമന്ത്രി പ്രകടിപ്പിച്ചു.
