തിരുവനന്തപുരം: നാരായണ ഗുരുദേവനെയും രാജാറാം മോഹൻ റായിയെപ്പോലെയുമുള്ള നവോത്ഥാനനായകരുടെ അഭാവമാണ് ഇന്ത്യൻ മുസ്ലീം നേരിടുന്ന പ്രധാന പ്രശ്‌നമെന്ന് ബിജെപി ദേശീയ വൈസ്പ്രസിഡന്റും ഹജ്ജ്കമ്മിറ്റി ചെയർമാനുമായ എ.പി. അബ്ദുള്ളക്കുട്ടി. ഹിന്ദുധർമ്മസഭ തിരുവനന്തപുരം പ്രസ്‌ക്ലബിൽ ‘ഏക സിവിൽ കോഡ് എന്ത്? എന്തിന്?’ എന്ന വിഷയത്തിൽ സംഘടിപ്പിച്ച സെമിനാർ ഉദ്ഘാടനം ചെയ്യുകയായിരുന്നു അദ്ദേഹം.
ഭരണഘടനയിൽ പൊതു സിവിൽ നിയമത്തിന്റെ ആവശ്യകത വ്യക്തമാക്കിയിട്ടുണ്ട്. സുപ്രീംകോടതി മൂന്നുതവണയും വിവിധ ഹൈക്കോടതികൾ പത്തുതവണയും പൊതു സിവിൽ നിയമം നടപ്പാക്കാത്തതിൽ ശക്തമായ വിമർശനം നടത്തിയിട്ടുണ്ട്. ജസ്റ്റിസ് ഫാത്തിമാബീവി ഉൾപ്പെടെ നിയമരംഗത്തെ പല പ്രമുഖരും രാഷ്‌ട്രീയരംഗത്ത് ഇഎംഎസ് മുതൽ ആരിഫ് മുഹമ്മദ് ഖാൻ വരെയുള്ളവരും ഇതേ ആവശ്യം ഉന്നയിച്ചിട്ടുണ്ട്. എന്നാൽ ഭോപ്പാലിൽ പ്രധാനമന്ത്രി നരേന്ദ്രമോദി പൊതു സിവിൽ നിയമത്തെക്കുറിച്ച് പറഞ്ഞതോടെ മുസ്ലീങ്ങളെ തെറ്റിദ്ധരിപ്പിക്കാനാണ് സിപിഎം ശ്രമിക്കുന്നത്.
സിപിഎം ഇപ്പോൾ മുസ്ലീംലീഗിനെ കൂട്ടുപിടിക്കുകയാണ്. പണ്ട് എം.വി. രാഘവൻ മുസ്ലീംലീഗുമായി ചേരുന്നതിനെക്കുറിച്ചു പറഞ്ഞപ്പോൾ അതിനെ താത്വികമായി ന്യായീകരിച്ച ആളാണ് ഇന്നത്തെ പാർട്ടി സെക്രട്ടറി എം.വി. ഗോവന്ദൻ. അതിന് അദ്ദേഹത്തെ പിണറായി വിജയൻ മൊറാഴ ബ്രാഞ്ചിലേക്ക് തരംതാഴ്‌ത്തിയിരുന്നു. ഇന്ന് ലീഗിനെ കൂടെക്കൂട്ടി പിണറായി വിജയനോട് പ്രതികാരം ചെയ്യുകയാണ് എം.വി. ഗോവിന്ദൻ. പിണറായിവിജയനാകട്ടെ മരുമകന് മുഖ്യമന്ത്രിസ്ഥാനം കിട്ടാൻ വേണ്ടി മുസ്ലീം വർഗീയതയെ കൂട്ടുപിടിക്കുകയാണ്. 1985 ൽ ഏകസിവിൽകോഡിനെതിരെ സമരം നടത്തിയ ലീഗ് ‘രണ്ടുംകെട്ടും നാലുംകെട്ടും ഇഎംഎസിന്റെ ഓളേം കെട്ടും’ എന്ന് മുദ്രാവാക്യം വിളിച്ചിരുന്നു. സിപിഎം ലീഗിനോട് കൂട്ടുകൂടുന്നത് മറ്റാര് ക്ഷമിച്ചാലും ഇഎംഎസിന്റെ ഭാര്യ ആര്യാ അന്തർജ്ജനം ക്ഷമിക്കില്ല.
വിവിധ ഇസ്ലാമിക രാജ്യങ്ങളിൽ വ്യക്തിനിയമം വിവിധ രീതികളിലാണ് നടപ്പാക്കുന്നത്. ഇതൊന്നും ഖുറാന്റെ അടിസ്ഥാനത്തിലല്ല. മുഹമ്മദ് നബിക്ക് മുഹമ്മദ് സെയ്ദ് എന്ന പേരിൽ ഒരു ദത്തുപുത്രനുണ്ടായിരുന്നു. മൊറോക്കോയിൽ സ്ത്രീകൾക്ക് ഭർത്താവിനെ മൊഴി നൽകാം. പാകിസ്ഥാനിൽ സ്ത്രീകൾക്ക് നേരിട്ട് വിവാഹം കഴിക്കാം. രണ്ടുസാക്ഷികൾ വേണമെന്നേയുള്ളു. ഇത്തരത്തിൽ സൗകര്യംപോലെ ഖുറാനെ ഓരോരുത്തരും വ്യാഖ്യാനിക്കുകയാണെന്നും 70 ശതമാനം ഖദീസുകളും ഖുറാന് എതിരാണെന്ന് സൗദിരാജകുമാരൻ തുറന്നുപറഞ്ഞിട്ടുണ്ടെന്നും അബ്ദുള്ളക്കുട്ടി കൂട്ടിച്ചേർത്തു.
കോൺഗ്രസും സിപിഎമ്മും ലീഗും ഒരുമിച്ച് നിൽക്കുമ്പോഴെല്ലാം ഭാരതത്തിൽ വിഭജനം അല്ലെങ്കിൽ കലാപം ഉണ്ടാകാറുണ്ടെന്ന് കുരുക്ഷേത്ര ചീഫ് എഡിറ്റർ കാ.ഭാ.സുരേന്ദ്രൻ പറഞ്ഞു. രാജ്യവിഭജനത്തിനുവേണ്ടി 1940 ൽ ലീഗും 42 ൽ കമ്മ്യൂണിസ്റ്റുപാർട്ടിയും 47 ൽ കോൺഗ്രസും രാജ്യവിഭജനത്തിനുവേണ്ടി പ്രമേയം പാസാക്കി. തുടർന്ന് ഹിന്ദിക്കെതിരെ, മതംമാറ്റത്തിനുവേണ്ടി, ഷാബാനുകേസിൽ, അയോധ്യതർക്കത്തിൽ, പൗരത്വനിയമത്തിനെതിരെ എന്നുവേണ്ട കലാപത്തിനുള്ള അവസരങ്ങളിലെല്ലാം ഇവർ ഒത്തുകൂടുന്നുവെന്നും അദ്ദേഹം പറഞ്ഞു. അഡ്വ. ശാസ്തമംഗലം അജിത്കുമാർ അധ്യക്ഷത വഹിച്ചു. യുക്തികൊണ്ട് ചിന്തിക്കുന്നവർക്ക് അത്യാവശ്യമായ ഒന്നാണ് ഏക സിവിൽ കോഡ് എന്ന് അദ്ദേഹം പറഞ്ഞു. മാധ്യമപ്രവർത്തകൻ ജി.കെ. സുരേഷ്ബാബു, എ.കെ.എൻ. അരുൺ, ഷാജു വേണുഗോപാൽ തുടങ്ങിയവർ സംസാരിച്ചു.
പ്രതികരിക്കാൻ ഇവിടെ എഴുതുക: