മങ്കൊമ്പ്: ജില്ലയില് മഴയ്ക്ക് ശക്തി കുറഞ്ഞെങ്കിലും മഴക്കെടുതികള് രൂക്ഷം. കുട്ടനാട്ടിലും അപ്പര് കുട്ടനാട്ടിലും കാര്ഷിക മേഖലയിലാണ് പ്രതിസന്ധി രൂക്ഷം. പ്രധാന റോഡുകളിലെല്ലാം വെള്ളം കയറിയതിനാല് യാത്രയും തടസപ്പെടുന്നു. മിക്ക പാടശേഖരങ്ങളും വെള്ളത്തില് മുങ്ങി .
കിഴക്കന് വെള്ളത്തിന്റെ വരവ് ശക്തമായതോടെ പമ്പ, മണിമല, അച്ചന്കോവിലാറുകളിലും കൈവഴികളിലും അപകടനിലയ്ക്ക് മുകളിലാണ് ജലനിരപ്പ്. പമ്പാ നദി കരകവിഞ്ഞതിനാല് ചമ്പക്കുളം ബസ് സ്റ്റാന്ഡ് വെള്ളത്തില് മുങ്ങി. വ്യാപാര സ്ഥാപനങ്ങളില് വെള്ളം കയറി. സാമൂഹ്യാരോഗ്യ കേന്ദ്രത്തിന്റെ പരിസരത്തും വെള്ളം നിറഞ്ഞു. കുട്ടനാട് താലൂക്ക് ഓഫീസ് പരിസരത്തും വെള്ളം നിറഞ്ഞു. മങ്കൊമ്പില് താഴ്ന്നയിടത്തെ വീടുകളിലെല്ലാം വെള്ളമാണ്.
60 ല് ചിറ കോളനിയില് വെള്ളം കയറി. മങ്കൊമ്പ് -വികാസ് മാര്ഗ് റോഡ്, പള്ളിക്കൂട്ടുമ്മ – പുളിങ്കുന്ന് റോഡ്, കണ്ടങ്കരി റോഡ്, ചമ്പക്കുളം – എടത്വ റോഡ് തുടങ്ങിയ വയുടെ പല ഭാഗങ്ങളും വെളളത്തില് മുങ്ങി. കുട്ടനാട്ടിലും അപ്പര് കുട്ടനാട്ടിലും താഴ്ന്ന പ്രദേശങ്ങളിലെ വീടുകളില് വെള്ളം കയറി. എടത്വ, തല വടി തുടങ്ങിയ ഭാഗങ്ങളില് വെള്ളം കയറിയ വീടുകളില് നിന്ന് പ്രായമായവരെ അടക്കം നിരവധി പേരെ അഗ്നി രക്ഷാ സേന രക്ഷിച്ച് ക്യാമ്പുകളിലേക്ക് മാറ്റി. ചമ്പക്കുളത്തെ മൂലപ്പള്ളിക്കാട്, ചെമ്പടി – ചക്ക ങ്കരി, നെടുമുടിയിലെ മണപ്ര, മഠത്തില് മുല്ലാക്കല് എന്നീ പാടങ്ങള് വെള്ളത്തില് മുങ്ങി . പുളിങ്കുന്ന് താലൂക്ക് ആശുപത്രി പാലത്തിനടിയില് ഒഴുകിയെത്തിയ മാലിന്യം കുന്നു കൂടിയത് ജലഗതാഗതത്തെ ബാധിച്ചു.
