ബെംഗളൂരു: ഇസ്ലാമിക ഭീകരനും പിഡിപി അധ്യക്ഷനുമായ അബ്ദുള്‍ നാസര്‍ മദനിയുടെ 12 ദിവസത്തെ കേരളയാത്രാച്ചെലവില്‍ കര്‍ണാടകത്തിലെ കോണ്‍ഗ്രസ് സര്‍ക്കാര്‍ വന്‍ ഇളവു നല്കി. കേരളത്തിലെ യാത്രയ്‌ക്ക് സുരക്ഷയൊരുക്കാന്‍ വേണ്ടിവരുന്ന ചെലവിന് 51 ലക്ഷം രൂപ കെട്ടിവയ്‌ക്കാന്‍ മുന്‍ ബിജെപി സര്‍ക്കാര്‍ നിര്‍ദേശിച്ചിരുന്നു. എന്നാല്‍, വെറും ആറു ലക്ഷം രൂപ മാത്രമാണ് സിദ്ധരാമയ്യ സര്‍ക്കാര്‍ വാങ്ങുന്നത്. ബാക്കി 45 ലക്ഷം രൂപ ജനങ്ങളുടെ നികുതിപ്പണം അടങ്ങിയ സര്‍ക്കാര്‍ ഖജനാവില്‍ നിന്നാണ് വഹിക്കുന്നത്. ബോംബ് സ്‌ഫോടനങ്ങളുമായി ബന്ധപ്പെട്ട കേസിലെ പ്രതിയായ കൊടും ക്രിമിനലിനു വേണ്ടിയാണ്, ഇസ്ലാമിസ്റ്റുകളുടെ വോട്ട് നേടാന്‍ കോണ്‍ഗ്രസ് സര്‍ക്കാര്‍ വലിയ തുക ഇളവു ചെയ്തു നല്കിയത്. ഇന്നലെ രാത്രി ഏഴരയോടെ മദനി നെടുമ്പാശേരി വിമാനത്താവളത്തിലെത്തി.
ചികിത്സയ്‌ക്കും പിതാവിനെ കാണാനുമായി കേരളത്തിലേക്ക് വരാന്‍ മദനിക്ക് സുപ്രീംകോടതി അനുമതി നല്കിയിരുന്നു. സുരക്ഷയ്‌ക്ക് 20 അംഗ പോലീസ് സംഘത്തെ അയയ്‌ക്കാന്‍ 51 ലക്ഷം രൂപ കെട്ടിവയ്‌ക്കണമെന്നായിരുന്നു സിറ്റി ബെംഗളൂരു പോലീസ് കമ്മിഷണറുടെ നിര്‍ദേശം. ഈ തുക കുറയ്‌ക്കണമെന്ന മദനിയുടെ ആവശ്യം കേസിന്റെ ഗൗരവം കണക്കിലെടുക്കാതെയാണ് കര്‍ണാടക സര്‍ക്കാര്‍ അംഗീകരിച്ചത്. പോപ്പുലര്‍ ഫ്രണ്ട് അടക്കമുള്ള ഇസ്ലാമിസ്റ്റുകളുടെ വോട്ടുകളാണ് കര്‍ണാടകയില്‍ സിദ്ധരാമയ്യ സര്‍ക്കാരിനെ അധികാരത്തിലേറ്റിയതെന്ന വിമര്‍ശനം ശരിയെന്ന് തെളിയിക്കുന്നതാണ് സര്‍ക്കാര്‍ നടപടി. കെ.സി. വേണുഗോപാല്‍ അടക്കമുള്ള കോണ്‍ഗ്രസ് നേതാക്കള്‍ നിര്‍ദേശിച്ച പ്രകാരമാണ് സിദ്ധരാമയ്യ സര്‍ക്കാരിന്റെ നടപടി.
വരുന്ന ലോക്‌സഭാ, നിയമസഭാ തെരഞ്ഞെടുപ്പുകളില്‍ കേരളത്തിലെ ഇസ്ലാമിസ്റ്റുകളുടെ വോട്ട് ഉറപ്പിക്കുകയാണ് കോണ്‍ഗ്രസിന്റെ ലക്ഷ്യം. മദനിക്കു വേണ്ടി വമ്പന്‍ വിട്ടുവീഴ്ച നടത്തുന്നതു വഴി ഒരു സമുദായത്തിന്റെ മൊത്തം വോട്ട് പെട്ടിയിലാക്കാമെന്നാണ് കോണ്‍ഗ്രസിന്റെ കണക്കു കൂട്ടല്‍.
പ്രതികരിക്കാൻ ഇവിടെ എഴുതുക: