തിരുവനന്തപുരം: ജൂണ് 21 അന്താരാഷ്ട്ര യോഗാദിനത്തോടനുബന്ധിച്ച് കേന്ദ്ര വാര്ത്താവിതരണ പ്രക്ഷേപണ മന്ത്രാലയത്തിന് കീഴിലുള്ള സെന്ട്രല് ബ്യൂറോ ഓഫ് കമ്യൂണിക്കേഷന്, തിരുവനന്തപുരം ജില്ലയിലെ പൂവച്ചല് സര്ക്കാര് വെക്കേഷനല് ഹയര് സെക്കന്ഡറി സ്കൂളില് യോഗാദിന പരിപാടികള് സംഘടിപ്പിച്ചു. പൂവച്ചല് ഗ്രാമപഞ്ചായത്ത് പ്രസിഡന്റ് ടി. സനല്കുമാര് പരിപാടി ഉദ്ഘാടനം ചെയ്തു.
പിഐബി, സെന്ട്രല് ബ്യൂറോ ഓഫ് കമ്യൂണിക്കേഷന് കേരള ലക്ഷദ്വീപ് റീജിയന് അഡീഷണല് ഡയറക്ടര് ജനറല് വി. പളനിച്ചാമി ഐഐഎസ് അധ്യക്ഷത വഹിച്ചു. സെന്ട്രല് ബ്യൂറോ ഓഫ് കമ്യൂണിക്കേഷന് ജോയിന് ഡയറക്ടര് വി.പാര്വതി ഐഐഎസ് ആമുഖപ്രസംഗം നടത്തി. ‘കൗമാരക്കാര്ക്ക് യോഗയിലൂടെആരോഗ്യം’ എന്ന വിഷയത്തില് കാട്ടാക്കട സര്ക്കാര് ആയുര്വേദ ഡിസ്പെന്സറിയിലെ സീനിയര് മെഡിക്കല് ഓഫിസര് ഡോക്ടര് ജി.പി. സിദ്ധിയും’ യോഗയിലൂടെ മനുഷ്യരാശിയുടെ വീണ്ടെടുപ്പ്’ എന്ന വിഷയത്തില് ഡോക്ടര് സജ്നാ ഡേവിഡും ക്ലാസുകള് എടുത്തു.
ഡോക്ടര് അന്പുറാണി യോഗ ഡെമോ സെഷന് നേതൃത്വം നല്കി. ലൈവ് യോഗ സെഷനില് നൂറിലധികം വിദ്യാര്ത്ഥികള് പങ്കെടുത്തു. സെന്ട്രല് ബ്യൂറോ കമ്യൂണിക്കേഷന് ഫീല്ഡ് എക്സിബിഷന് ഓഫീസര് ജൂണി ജേക്കബ്, പ്രധാന അധ്യാപികമാരായ പി.എസ്. പ്രിയ, സീമ സേവ്യര്, പ്രധാന അധ്യാപകന് എസ്.ബിജു കുമാര് എന്നിവര് പ്രസംഗിച്ചു. യോഗാമത്സരങ്ങള് സംഘടിപ്പിച്ച് വിജയികള്ക്ക് സമ്മാനങ്ങള് വിതരണം ചെയ്തു. യോഗ ദിനം ആസ്പദമാക്കി പാവ നാടകവും അരങ്ങേറി. വസുധൈവ കുടുംബകത്തിന് യോഗ എന്നതാണ് ഈ വര്ഷത്തെ അന്താരാഷ്ട്ര യോഗാദിനത്തിന്റെ പ്രമേയം.
