കോട്ടയം: വാഹനാപകടത്തില്‍ മരിച്ച നടന്‍ കൊല്ലം സുധിയുടെ സംസ്‌കാരം ഇന്ന്. ഉച്ചകഴിഞ്ഞ് 2 മണിക്ക് കോട്ടയം തോട്ടക്കാട് റീഫോര്‍മിഡ് ആഗ്ലിക്കന്‍ ചര്‍ച്ച് ഓഫ് ഇന്ത്യ സെമിത്തേരിയിലാണ് ചടങ്ങുകള്‍. പൊങ്ങന്താനത്തെ വീട്ടിലും പിന്നീട് പൊങ്ങന്താനം യുപി സ്‌കൂളിലും വാകത്താനം പഞ്ചായത്ത് കമ്മൂണിറ്റി ഹാളിലും പൊതു ദര്‍ശനമുണ്ടാവും. കൊല്ലത്തെ വീട്ടിലും സുധിയുടെ ഭൗതികശരീരം എത്തിച്ചിരുന്നു.
ഉച്ചയ്‌ക്ക് ഒന്നരയോടെ വിലാപയാത്രയായിട്ടാവും മൃതദേഹം സെമിത്തേരിയിലെത്തിക്കുക. രാഷ്‌ട്രീയ സാമൂഹിക സാംസ്‌കാരിക രംഗത്തെ പ്രമുഖര്‍ അന്തിമോപചാരമര്‍പ്പിക്കാനെത്തും. തിങ്കളാഴ്‌ച്ച പുലര്‍ച്ചെയാണ് വാഹനാപകടത്തില്‍ സുധി മരിക്കുന്നത്. വടകരയില്‍ നിന്നു പരിപാടികഴിഞ്ഞ് മടങ്ങിവരവേ എതിരെ വന്ന പിക്കപ്പ് വാനുമായി കൂട്ടിയിടിക്കുകയായിരുന്നു.
ഇതേ അപകടത്തില്‍ പരുക്കേറ്റ ബിനു അടിമാലി തീവ്ര പരിചരണ വിഭാഗത്തില്‍ ചികിത്സയില്‍ തുടരുകയാണ്. ഒപ്പമുണ്ടായിരുന്ന മഹേഷിന്റെയും വാഹനം ഓടിച്ചിരുന്ന ഉല്ലാസിന്റേയും ആരോഗ്യ നിലയില്‍ പുരോഗതിയുള്ളതായാണ് റിപ്പോര്‍ട്ടുകള്‍.
