വയനാട്: താമരശേരിയില് ബിരുദ വിദ്യാര്ഥിനിയെ ലഹരി മരുന്ന് നല്കി പീഡിപ്പിച്ച് ചുരത്തിൽ ഉപേക്ഷിച്ച കേസിലെ പ്രതി പിടിയില്. കല്പ്പറ്റ സ്വദേശി ജിനാഫ് ആണ് പിടിയിലായത്. തമിഴ്നാട്ടില്നിന്നാണ് ഇയാളെ കസ്റ്റഡിയിലെടുത്തത്.
താമരശേരിയിലെ സ്വകാര്യ കോളജിലെ വിദ്യാര്ഥിനിയെ പ്രണയം നടിച്ച് കൂടെ കൂട്ടിയ ശേഷം ലഹരി നല്കി പീഡിപ്പിക്കുകയായിരുന്നു. പിന്നീട് പെണ്കുട്ടിയെ ചുരത്തില് ഉപേക്ഷിച്ചു. കഴിഞ്ഞ ചൊവ്വാഴ്ചയാണ് പെണ്കുട്ടിയെ കാണാതായത്. വീട്ടിലേക്ക് പോകുകയാണെന്ന് പറഞ്ഞ് ഹോസ്റ്റലില്നിന്ന് ഇറങ്ങിയതായിരുന്നു പെണ്കുട്ടി. തിരിച്ചെത്താത്തതിനെ തുടര്ന്ന് ഹോസ്റ്റല് അധികൃതര് വീട്ടിലേക്ക് വിളിച്ചപ്പോഴാണ് അവിടെ എത്തിയിട്ടില്ലെന്ന് മനസിലായത്. തുടര്ന്ന് പിതാവ് പോലീസില് പരാതി നല്കുകയായിരുന്നു.
വ്യാഴാഴ്ച രാത്രി പോലീസ് പട്രോളിംഗിനിടെ ഒന്പതാം വളവില് നിന്നാണ് പെണ്കുട്ടിയെ കണ്ടെത്തിയത്. തുടർന്ന് നടന്ന അന്വേഷണത്തിലാണ് പീഡന വിവരം പുറത്ത് അറിയുന്നത്. വിദ്യാർത്ഥിനിയെ മയക്കുമരുന്ന് നൽകി കാറിൽ കയറ്റി എറണാകുളമടക്കം സംസ്ഥാനത്തിന്റെ വിവിധ സ്ഥലങ്ങളിൽ കൊണ്ടുപോയി പീഡിപ്പിച്ച ശേഷം താമരശ്ശേരി ചുരത്തിന്റെ ഒൻപതാം വളവിൽ ഉപേക്ഷിക്കുകയായിരുന്നുവെന്ന് പോലീസ് പറയുന്നു.
