പനാജി: ഭീകരതയെ ന്യായീകരിക്കാനാകില്ലെന്നും അതിര്‍ത്തി കടന്നുള്ള ഭീകരത ഉള്‍പ്പെടെയുള്ള എല്ലാ തരത്തിലുമുളള ഭീകരതയും അവസാനിപ്പിക്കണമെന്നും വിദേശകാര്യ മന്ത്രി എസ് ജയശങ്കര്‍ . ഗോവയില്‍ ഷാംഹായ് സഹകരണ സംഘടന(എസ്സിഒ) വിദേശകാര്യ മന്ത്രിമാരുടെ യോഗത്തില്‍ സംസാരിക്കുകയായിരുന്നു അദ്ദേഹം. തീവ്രവാദത്തിന്റെ വിപത്ത് തുടരുകയാണെന്നും തീവ്രവാദത്തെ ചെറുക്കുക എന്നത് ഷാംഹായ് സഹകരണ സംഘടനയുടെ ഉത്തരവാദിത്തങ്ങളിലൊന്നാണെന്നും അദ്ദേഹം പറഞ്ഞു. പാകിസ്ഥാന്‍ വിദേശകാര്യ മന്ത്രി ബിലാവല്‍ ഭൂട്ടോയും യോഗത്തില്‍ പങ്കെടുക്കുന്നുണ്ട്.
മേഖല നേരിടുന്ന വലിയ ഭീഷണിയായി ഭീകരതയെ വിശേഷിപ്പിച്ച ഡോ ജയശങ്കര്‍, ഭീകരവിരുദ്ധ നടപടികള്‍ കാലഘട്ടത്തിന്റെ ആവശ്യമാണെന്ന് പറഞ്ഞു. ഈ ഭീഷണി വകവയ്‌ക്കാതിരിക്കുന്നത് നമ്മുടെ സുരക്ഷാ താല്‍പ്പര്യങ്ങള്‍ക്ക് ഹാനികരമാണെന്നും തീവ്രവാദ പ്രവര്‍ത്തനങ്ങള്‍ക്കുള്ള സാമ്പത്തിക സഹായങ്ങള്‍ തടയണമെന്നും അദ്ദേഹം പറഞ്ഞു.ഇംഗ്ലീഷ് ഔദ്യോഗിക ഭാഷയായ അംഗരാജ്യങ്ങളുമായി ശക്തമായി ഇടപെടുന്നതിനായി ഷാംഹായ് സഹകരണ സംഘടനയുടെ മൂന്നാമത്തെ ഔദ്യോഗിക ഭാഷയായി ഇംഗ്ലീഷിനെ അംഗീകരിക്കണമെന്ന ഇന്ത്യയുടെ ദീര്‍ഘകാലമായുള്ള ആവശ്യത്തിന് അംഗരാജ്യങ്ങളുടെ പിന്തുണയും ഡോ. ജയശങ്കര്‍ അഭ്യര്‍ത്ഥിച്ചു.
സംഘടനയ്‌ക്ക് അധ്യക്ഷത വഹിക്കുന്ന രാജ്യം എന്ന നിലയില്‍ ഇന്ത്യ, നിരീക്ഷക പദവിയുളള രാജ്യങ്ങളെ 14-ലധികം സാമൂഹിക-സാംസ്‌കാരിക പരിപാടികളിലേക്ക് ക്ഷണിച്ചിട്ടുണ്ട് . ജൂലൈയില്‍ നടക്കുന്ന ഉച്ചകോടിയുടെ പരിഗണനയ്‌ക്കായി വ്യാപാരം, സാങ്കേതികവിദ്യ, വാണിജ്യം, സുരക്ഷ, സാമൂഹിക-സാംസ്‌കാരിക ബന്ധങ്ങള്‍ എന്നീ മേഖലകളില്‍ എസ്സിഒ അംഗരാജ്യങ്ങള്‍ തമ്മിലുള്ള സഹകരണം വിപുലീകരിക്കുന്നതിനുളള നിര്‍ദേശങ്ങള്‍ ഇന്ന് സമാപിക്കുന്ന യോഗത്തില്‍ കൈക്കൊളളും.
എസ്സിഒ യോഗത്തോടനുബന്ധിച്ച് ഡോ ജയശങ്കര്‍ ചൈനീസ്, റഷ്യന്‍, ഉസ്ബെക്കിസ്ഥാന്‍ പ്രതിനിധികളുമായി ഉഭയകക്ഷി ചര്‍ച്ചകള്‍ നടത്തി. ഇന്ത്യക്ക് പുറമെ റഷ്യ, ചൈന, പാകിസ്ഥാന്‍, കസാക്കിസ്ഥാന്‍, കിര്‍ഗിസ്ഥാന്‍, താജിക്കിസ്ഥാന്‍, ഉസ്ബെക്കിസ്ഥാന്‍ എന്നീ നാല് മധ്യേഷ്യന്‍ രാജ്യങ്ങളും എസ്സിഒയില്‍ അംഗങ്ങളാണ്.
