അഡ്വ. കെ.കെ. ബാലറാം
രാഷ്ട്രീയ സ്വയംസേവക സംഘം പ്രാന്തസംഘചാലക്
കണ്ണൂര് സ്വദേശിയാണ് അഡ്വ. ഗോവിന്ദ് കെ. ഭരതന്. നിയമവൃത്തി സ്വീകരിച്ച് എറണാകുളത്ത് സ്ഥിരതാമസമാക്കുകയാണുണ്ടായത്. കേരളത്തിലെ അറിയപ്പെടുന്ന അഭിഭാഷകന് എന്ന നിലയില് മാത്രമല്ല അദ്ദേഹം ഒരു ബഹുമുഖ പ്രതിഭയായിരുന്നു. നല്ല ഗായകനും ശില്പകലാ വിദഗ്ധനും വിദൂരയാത്രകളെ ഏറെ ഇഷ്ടപ്പെടുന്നയാളും മികച്ച സംഘാടകനും വാഗ്മിയുമായിരുന്നു അദ്ദേഹം.
തലയെടുപ്പും ശബ്ദസൗന്ദര്യവും അദ്ദേഹത്തിലേക്ക് ജനങ്ങളെ ആകര്ഷിച്ചിരുന്നു. ആരാലും. ഏതു സദസ്സിലും ശ്രദ്ധിക്കപ്പെടുന്ന ഒരു വ്യക്തിത്വം അദ്ദേഹത്തിനുണ്ടായരുന്നു. ദേശീയ വീക്ഷണമുള്ള അഭിഭാഷകരുടെ സംഘടനയായ അഭിഭാഷക പരിഷത്ത് ആദ്യമായി കേരളത്തില് രൂപീകരിക്കുന്ന വേളയില് അഡ്വ.ടി.വി. അനന്തേട്ടനൊടൊപ്പം അദ്ദേഹം സജീവമായി പ്രവര്ത്തിച്ചു. കേരളത്തിലങ്ങോളമിങ്ങോളം വിവിധ ബാറുകളില് സഞ്ചരിച്ച് അഭിഭാഷക പരിഷത്തിന്റെ യൂണിറ്റുകള് സ്ഥാപിച്ച് ഇന്ന് അഭിഭാഷക പരിഷത്തിനെ കേരളത്തിലെ മികച്ച ഒരു അഭിഭാഷക സംഘടനയായി വളര്ത്തിയതില് അദ്ദേഹത്തിന്റെ പങ്ക് നിസ്തുലമാണ്.
ഇന്നും ഓര്മ്മയില് തിളങ്ങിനില്ക്കുന്നത് എറണാകുളത്ത് നടന്ന ഐതിഹാസികമായ വിശാല ഹിന്ദു സമ്മേളനവേദിയിലെ അദ്ദേഹത്തിന്റെ സാന്നിധ്യമാണ്. ഇതേ തലയെടുപ്പോടെ അദ്ദേഹം അവിടെ നിറഞ്ഞുനിന്നു. ക്ഷേത്ര സംബന്ധിയായ ആചാരാനുഷ്ഠാനങ്ങളില് മാത്രമല്ല നിയമകാര്യങ്ങളിലും അദ്ദേഹത്തിന്റെ പ്രാഗത്ഭ്യവും അറിവും തെളിയിക്കപ്പെട്ടിരുന്നു. മലബാറിലെ ക്ഷേത്ര ജീവനക്കാരുടെ ശോചനീയാവസ്ഥ ഹിന്ദു പത്രം റിപ്പോര്ട്ട് ചെയ്തത് സ്വമേധയാ റിട്ട് ഹര്ജിയാക്കി സ്വീകരിച്ച ജസ്റ്റിസ്. ബാലനാരായണമാരാരുടെയും ജസ്റ്റിസ് ബാലസുബ്രഹ്മണ്യത്തിന്റെയും മുമ്പാകെ നടന്ന വാദങ്ങളില് അഡ്വ. ഗോവിന്ദ് കെ. ഭരതന്റെ അവതരണ ചാതുരി വളരെ പ്രശംസിക്കപ്പെട്ടിട്ടുണ്ട്.
ദേവസ്വം കാര്യങ്ങളില് ഭക്തജനങ്ങളുടെ താല്പര്യ സംരക്ഷണത്തിനുവേണ്ടി മാത്രമല്ല ദേവസ്വം ഭരണം രാഷ്ട്രീയ വിമുക്തമാക്കുന്നതിനായും നിരന്തരപോരാട്ടം നടത്തിയ സാമൂഹ്യപ്രവര്ത്തകന് കൂടിയായിരുന്നു അദ്ദേഹം. തികഞ്ഞ ഒരു സായീഭക്തനായ അദ്ദേഹം ജീവിതത്തിലുടനീളം ഒരു സാധകനായും ഉപാസകനായും ജീവിതം നയിച്ച വ്യക്തിയായിരുന്നു. കേന്ദ്രസര്ക്കാരിന്റെ സീനിയര് അഭിഭാഷകന് കൂടിയായ അദ്ദേഹം കോടതിക്കകത്തും ന്യായാധിപര്ക്കിടയിലും ശ്രദ്ധേയമായ വ്യക്തിത്വമായിരുന്നു. അദ്ദേഹത്തിന്റെ ആകസ്മികമായ നിര്യാണം ദേശീയ പ്രസ്ഥാനങ്ങള്ക്കും നിയമലോകത്തിനും ഒരു തീരാനഷ്ടമാണ്. അദ്ദേഹത്തിന്റെ വിയോഗത്തില് വ്യക്തിപരമായും രാഷ്ട്രീയ സ്വയംസേവക സംഘത്തിന്റെ പേരിലും അനുശോചനം രേഖപ്പെടുത്തുന്നു.
