ചണ്ഡീഗഢ് : ഖാലിസ്ഥാന്‍, വാരിസ് പഞ്ചാബ് ദേ നേതാവ് അമൃത്പാല്‍ സിങ്ങിനും സഹായി പപല്‍പ്രീത് സിങ്ങിനും ഒളിത്താവളമൊരുക്കിയ പട്യാല സ്വദേശിനി അറസ്റ്റില്‍. ബല്‍ബീര്‍ കൗര്‍ എന്ന സ്ത്രീയാണ് പഞ്ചാബ് പോലീസിന്റെ പിടിയിലായത്.
പട്യാലയിലെ ഹര്‍ഗോബിന്ദ് നഗറിലുള്ള വസതിയില്‍ മാര്‍ച്ച് 19 നാണ് അമൃത് പാല്‍ സിങ്ങിനും സഹായിക്കും പോലീസിന്റെ കണ്ണുവെട്ടിച്ച് കഴിയാന്‍ സഹായം നല്‍കിയെന്ന് ആരോപിച്ചാണ് ബല്‍ബീറിനെ അറസ്റ്റ് ചെയ്തത്. ഏകദേശം ആറ് മണിക്കൂറോളമാണ് ഇരുവരും ബല്‍ബീറിന്റെ വീട്ടില്‍ തങ്ങിയത്. അവിടെ നിന്നാണ് ഇരുവരും ഹരിയാണയിലെ കുരുക്ഷേത്ര ജില്ലയിലെ ഷഹബാദിലേക്ക് നീങ്ങിയത്.
ഷഹബാദില്‍ അമൃത്പാലിന് ഒളിവില്‍ കഴിയാന്‍ സഹായം നല്‍കിയ ബല്‍ജിത്ത് കൗര്‍ എന്ന സ്ത്രീ നേരത്തെ തയന്നെ പോലീസ് പിടിയിലായിരുന്നു. പഞ്ചാബില്‍ നിന്ന് അമൃത് പാല്‍ കടന്നുകളഞ്ഞതോടെ അയല്‍ സംസ്ഥാനങ്ങളിലേക്ക് കൂടി അന്വേഷണം വ്യാപിപ്പിച്ചിരുന്നു. അമൃത്പാല്‍ സിങ്ങുമായി ബന്ധമുള്ള നൂറോളം പേര്‍ ഇതിനോടകം തന്നെ പോലീസ് കസ്റ്റഡിയിലാണ്. അതിര്‍ത്തികളിലും അമൃത്പാല്‍ സിങ്ങിനായി തെരച്ചില്‍ നടത്തി വരികയാണ്.
പ്രതികരിക്കാൻ ഇവിടെ എഴുതുക: