തിരുവനന്തപുരം : ബ്രഹ്മപുരം പ്രതിസന്ധിയില് സര്ക്കാരിനും കോര്പ്പറേഷനും ജനങ്ങള്ക്കും ഉത്തരവാദിത്തമുണ്ട്. ഒരു സര്ക്കാരിന്റെ കാലത്തുണ്ടായ കൂമ്പാരമൊന്നുമല്ല അവിടത്തേത്. പതിറ്റാണ്ടുകളായിട്ടുള്ളതാണെന്ന് സിപിഎം സംസ്ഥാന സെക്രട്ടറി എം.വി.ഗോവിന്ദന്. ബ്രഹ്മപുരം മാലിന്യ പ്ലാന്റിന് കരാര് നല്കിയത് സിപിഎം നേതാവിന്റെ കമ്പനിക്കാണെന്ന് റിപ്പോര്ട്ടുകള് പുറത്തുവന്നിതിന് പിന്നാലെ സംസാരിക്കുകയായിരുന്നു എം.ഡവി. ഗോവിന്ദന്.
കൊല്ലം മാതൃകയില് ബ്രഹ്മപുരത്തെ മാലിന്യം സംസ്കരണം കൈകാര്യം ചെയ്തുകൊണ്ടുപോകാന് സാധിക്കും. മാലിന്യപ്ലാന്റില് നിന്നും പുക ഉയരുന്നത് സംബന്ധിച്ചുള്ള ആക്ഷേപങ്ങളെല്ലാം പരിശോധിച്ച് കൃത്യമായ നടപടികള് സ്വീകരിക്കും. വിഷയത്തില് വേണ്ട നടപടികള് കൈക്കൊള്ളുമെന്ന് മുഖ്യമന്ത്രിയും വ്യക്തമാക്കിയിട്ടുള്ളതാണ്.
കരാര് കമ്പനിക്ക് പണം കൊടുത്തതുമായി ബന്ധപ്പെട്ട ആക്ഷേപങ്ങള് ശരിയല്ലെന്നും തദ്ദേശവകുപ്പ് കൃത്യമായി പരിശോധിച്ചാണ് പണം നല്കിയത്. താന് മന്ത്രിയായിരിക്കുമ്പോഴും മേയറെയും കരാറുകാരെയും വിളിച്ച് റിവ്യൂ നടത്തിയിട്ടുണ്ട്. പ്രശ്ന പരിഹാരത്തിന് സര്ക്കാരിനും ജനങ്ങള്ക്കും നഗരസഭയ്ക്കും എല്ലാം ഉത്തരവാദിത്തമുണ്ട്. സര്ക്കാര് നല്ല ജാഗ്രതയോടെയാണ് വിഷയം കൈകാര്യം ചെയ്യുന്നത്. ആരോഗ്യ വകുപ്പിന്റെ ഇടപെടലുകളും വൈകിട്ടിയിട്ടില്ലെന്നും എം.വി. ഗോവിന്ദന് അറിയിച്ചു.
അതിനിടയിലും കേന്ദ്ര സര്ക്കാരിനെ വിമര്ശിക്കാനും എം.വി. ഗോവിന്ദന് മറന്നില്ല. സഹകരണ മേഖലയെ പിടിയിലൊതുക്കുന്നതിന് വേണ്ടി കുറച്ച് കാലമായി കേന്ദ്രം ശ്രമിക്കുന്നുണ്ട്. അമിത് ഷാ തന്നെ ആ വകുപ്പ് ഏറ്റെടുത്ത് കേരളത്തെ ലക്ഷ്യം വെച്ചുകൊണ്ടാണ് നീങ്ങുന്നത്. സഹകരണ മേഖലയുടെ പ്രധാന ഘടകം കേരളത്തിലാണെന്നതാണ് കാരണമെന്നും എം.വി.ഗോവിന്ദന് വ്യക്തമാക്കി.
കക്കുകളി നാടക വിവാദത്തിലും അദ്ദേഹം പ്രതികരണം നടത്തി. നാടകം നാടകത്തിന്റേതായ രൂപത്തില് പോകാം. ആര്ക്കും വിമര്ശിക്കാം. നാടകം അവതരിപ്പിക്കാനുള്ള അവകാശവും അതിനെ വിമര്ശിക്കാനുള്ള അവകാശവും ഉണ്ടെന്നും എം.വി. ഗോവിന്ദന് കൂട്ടിച്ചേര്ത്തു.
