കൊച്ചി : നാല് ദിവസത്തോളമായി ബ്രഹ്മപുരത്ത് തുടരുന്ന തീ നിയന്ത്രണവിധേയം. ജനങ്ങള് ഭയപ്പെടേണ്ട സാഹചര്യമില്ലെന്ന് മന്ത്രി പി. രാജീവ്. ഞായറാഴ്ച വൈകിട്ടോടെ തീ പൂര്ണ്ണമായും അണയ്ക്കാന് സാധിക്കുമെന്നാണ് പ്രതീക്ഷിക്കുന്നത്. പ്രത്യേക സാഹചര്യത്തില് ആരോഗ്യമന്ത്രി വീണാ ജോര്ജിന്റെ അധ്യക്ഷതയില് ചേര്ന്ന അടിയന്തിര യോഗത്തിന് ശേഷം സംസാരിക്കുകയായിരുന്നു അദ്ദേഹം.
വൈകുന്നേരത്തോടു കൂടി തീ പൂര്ണമായും അണക്കാന് കഴിയും. വീടുകളിലെ മാലിന്യ നീക്കം സ്തംഭിച്ചിട്ടുണ്ട്. അത് മറ്റു പ്രശ്നങ്ങളിലേക്ക് പോകാന് ഇടയുണ്ട്. താത്കാലികമായി മാലിന്യനീക്കം പുനരാരംഭിക്കാന് കളക്ടറുടെ നേതൃത്വത്തില് പ്രത്യേക സംവിധാനം ഏര്പ്പെടുത്തുമെന്നും മന്ത്രി പറഞ്ഞു.
ജനങ്ങള് പുറത്തിറങ്ങരുതെന്ന് നിര്ദേശിച്ചിരുന്നെങ്കിലും ഇപ്പോള് അങ്ങനെയൊരു സാഹചര്യമില്ല. ആസ്ത്മ രോഗബാധിതര് മാത്രം പുറത്തിറങ്ങാതിരിക്കാന് ശ്രദ്ധിച്ചാല് മതിയാകും. ആളുകള്ക്ക് മാസ്ക് ധരിച്ച് പുറത്തിറങ്ങാം. ഇത്തരം സാഹചര്യങ്ങള് നേരിടാന് സ്ഥിരം സംവിധാനം ഉണ്ടാകും. ബ്രഹ്മപുരത്തെ പ്രവര്ത്തനങ്ങള് വിലയിരുത്താന് പ്രത്യേക കോഓര്ഡിനേഷന് കമ്മിറ്റിക്കു രൂപം നല്കുമെന്നും മന്ത്രി പി. രാജീവ് പറഞ്ഞു.
ബ്രഹ്മപുരത്തു നിന്നുള്ള പുക ശ്വസിച്ചു കാര്യമായ ആരോഗ്യപ്രശ്നങ്ങള് ഇതുവരെ റിപ്പോര്ട്ട് ചെയ്തിട്ടില്ലെന്നും ആശങ്ക വേണ്ടെന്നും ആരോഗ്യമന്ത്രി വീണാ ജോര്ജ് പറഞ്ഞു. പുക ശ്വസിച്ച് ആര്ക്കെങ്കിലും അസുഖങ്ങള് ഉണ്ടായാല് ചികിത്സയ്ക്കായി ആവശ്യമായ എല്ലാ സൗകര്യങ്ങളും ഏര്പ്പെടുത്തിയിട്ടുണ്ടെന്നും മന്ത്രി വ്യക്തമാക്കി.
ആശുപത്രികളില് ഓക്സിജന് സൗകര്യമുള്ള കിടക്കകളും സജ്ജമാക്കി. ബ്രഹ്മപുരത്ത് 2 ഓക്സിജന് പാര്ലറുകള് ഒരുക്കി. ബ്രഹ്മപുരത്തിനു തൊട്ടടുത്തുള്ള വടവുകോട് പ്രാഥമികാരോഗ്യ കേന്ദ്രത്തില് അടുത്ത ഒരാഴ്ച മുഴുവന്സമയ ഡോക്ടറുടെ സേവനം ലഭ്യമാക്കും. എല്ലാവരും മാസ്ക് ധരിക്കണം. എന്95 മാസ്ക് ധരിക്കുന്നതാണു നല്ലത്. 24 മണിക്കൂറും പ്രവര്ത്തിക്കുന്ന 2 കണ്ട്രോള് റൂമുകള് തുറന്നിട്ടുണ്ടെന്നും ആരോഗ്യമന്ത്രി കൂട്ടിച്ചേര്ത്തു.
