കോഴിക്കോട് : കോഴിക്കോട് കോര്പ്പറേഷന്റെ പഞ്ചാബ് നാഷണല് ബാങ്ക് അക്കൗണ്ടുകളില് നിന്നും പണം തട്ടിയ സംഭവത്തില് കോര്പ്പറേഷന് കൗണ്സില് യോഗത്തിനിടെ പ്രതിപക്ഷ ബഹളം. പ്രതിഷേധിച്ച 15 യുഡിഎഫ് കൗണ്സിലര്മാരെ മേയര് ബീന ഫിലിപ്പ് സസ്പെന്ഡ് ചെയ്തു.
പഞ്ചാബ് നാഷണല് ബാങ്ക് തട്ടിപ്പുമായി ബന്ധപ്പെട്ട് കൗണ്സില് യോഗത്തില് ചര്ച്ച ചെയ്യണമെന്ന് കോണ്ഗ്രസും ബിജെപിയും ആവശ്യപ്പെടുകയും അതിനായി അടിയന്തിര പ്രമേയത്തിന് നോട്ടീസ് നല്കുകയും ചെയ്തിരുന്നു. എന്നാല് ആവശ്യം മേയര് തള്ളുകയും കൗണ്സിലര്മാര് പ്രതിഷേധം അറിയിക്കുകയുമായിരുന്നു. കൗണ്സില് യോഗം തുടങ്ങിയപ്പോള് തന്നെ കോണ്ഗ്രസ് അംഗം മൊയ്തീന് കോയ, ബിജെപി അംഗം റിനീഷ് എന്നിവര് പിഎന്ബി ബാങ്ക് തട്ടിപ്പില് അടിയന്തര പ്രമേയത്തിന് അനുമതി തേടി നോട്ടീസ് നല്കി. എന്നാല് കോര്പ്പറേഷന് നഷ്ടപ്പെട്ട പണം പഞ്ചാബ് നാഷണല് ബാങ്കില് നിന്നും തിരികെ ലഭിച്ചെന്നും ഇനി ഈ തുകയുടെ പലിശ മാത്രമാണ് ലഭിക്കാന് ബാക്കിയുള്ളത്. പലിശ തുക തരാന് ആവശ്യപ്പെട്ട് ബാങ്കിന് കത്ത് നല്കിയിരുന്നു.
പണം നല്കാമെന്ന് ബാങ്ക് ഉറപ്പ് നല്കിയിട്ടുണ്ടെന്നും വിശദീകരണം നല്കിയ ശേഷം പ്രമേയത്തിന് അടിയന്തര സ്വഭാവം ഇല്ലെന്നും അതിനാല് അനുമതി നിഷേധിക്കുന്നുവെന്നും മേയര് അറിയിക്കുകയായിരുന്നു. എന്നാല് പ്രതിപക്ഷ അംഗങ്ങള് പ്രതിഷേധം കടുപ്പിച്ചതോടെ കൗണ്സില് നടപടികള് മേയര് അല്പസമയത്തേക്ക് നിര്ത്തിവച്ചു. എന്നാല് മേയര് തിരിച്ചെത്തിയപ്പോഴും യുഡിഎഫ് അംഗങ്ങള് മുദ്രാവാക്യം വിളിയുമായി പ്രതിഷേധം തുടര്ന്നു.
ഇതോടെ സഭാ ചട്ടം ലംഘിച്ചതിന് പ്രതിപക്ഷ നേതാവ് ശോഭിത കെ.സി. ഉള്പ്പെടെ പ്രതിഷേധത്തില് പങ്കെടുത്ത കൗണ്സിലര്മാരെ സസ്പെന്റ് ചെയ്തതായി മേയര് ബീന ഫിലിപ്പ് പ്രഖ്യാപിച്ചു. പ്രതിപക്ഷ ബഹളം തുടരുന്നതിനിടെ നിശ്ചയിച്ച അജണ്ട പാസാക്കി കൗണ്സില് പിരിയുകയും ചെയ്തു. ഇതോടെ യുഡിഎഫ് അംഗങ്ങള് കൗണ്സില് ഹാളില് കുത്തിയിരുന്ന് പ്രതിഷേധിച്ചു. ബിജെപി അംഗങ്ങള് കൗണ്സില് യോഗം ബഹിഷ്കരിച്ച് ഇറങ്ങിപ്പോകുകയും ചെയ്തു.
