തിരുവനന്തപുരം: കുഫോസ് വിസിയെ പുറത്താക്കിയ ഹൈക്കോടതിവിധി സ്റ്റേ ചെയ്യണമെന്നാവശ്യപ്പെട്ട ഹര്ജി സുപ്രീംകോടതി നിരാകരിച്ചത് സംസ്ഥാന സര്ക്കാരിനേറ്റ തിരിച്ചടിയാണെന്ന് ബിജെപി സംസ്ഥാന അദ്ധ്യക്ഷന് കെ.സുരേന്ദ്രന്. കേസിന്റെ വിധി വരും വരെ ചാന്സിലര്ക്ക് ആക്ടിംഗ് വിസിയെ നിയമിക്കാമെന്ന കോടതിയുടെ നിലപാട് ഇടതു സര്ക്കാരിന്റെ എല്ലാ വാദവും തള്ളുന്നതാണ്.
അഴിമതിക്ക് കുടപിടിക്കാന് നിയമപോരാട്ടം നടത്തി വീണ്ടും വീണ്ടും നാണംകെടുന്ന ഇടത് സര്ക്കാര് കേരളത്തെ രാജ്യത്തിന് മുമ്പില് നാണംകെടുത്തുകയാണ്. മുഖ്യമന്ത്രി പിണറായി വിജയന് സിപിഎമ്മിനെ ഉപയോഗിച്ച് നടത്തുന്ന സമരങ്ങള് സുപ്രീംകോടതിക്കെതിരാണെന്ന് ഓരോ ദിവസവും വ്യക്തമായി വരുകയാണെന്നും സുരേന്ദ്രന് പറഞ്ഞു.
പിണറായി വിജയന് മുഖ്യമന്ത്രി സ്ഥാനത്ത് തുടരാന് ധാര്മ്മികമായ അവകാശമില്ലാതായിരിക്കുകയാണ്. ഗവര്ണറാണ് ശരിയെന്ന് കേരളജനതക്ക് പൂര്ണമായും മനസിലായി കഴിഞ്ഞു. സംസ്ഥാന സര്ക്കാരിന്റെ സ്വജനപക്ഷപാതത്തിനും അഴിമതിക്കുമെതിരായ പോരാട്ടം ബിജെപി കൂടുതല് ശക്തമാക്കുമെന്നും കെ.സുരേന്ദ്രന് പറഞ്ഞു.
