തൃശൂര്: മെഡി.കോളേജ് ആശുപത്രിയിലടക്കം ജില്ലയിലെ സര്ക്കാര് ആശുപത്രികളില് ന്യുമോണിയ, മഞ്ഞപ്പിത്തം, ആസ്മ, പ്രമേഹം എന്നിവയ്ക്കുള്ള മരുന്നുകള്ക്ക് രൂക്ഷമായ ക്ഷാമം. സര്ക്കാര് ഫാര്മസികളിലും കാരുണ്യ മെഡിക്കല് സ്റ്റോറുകളിലും ഇതേ ക്ഷാമമാണ്.
ഡോക്ടര്മാര് കുറിക്കുന്ന മരുന്ന് സൗജന്യമായാണ് സര്ക്കാര് ഫാര്മസികളില് നിന്ന് ലഭിച്ചിരുന്നത്. സ്വകാര്യ മെഡിക്കല് സ്റ്റോറുകളില് ഇതിന് വലിയ വില നല്കേണ്ട സാഹചര്യവുമുണ്ട്. ആശുപത്രിയില് എത്തുന്ന രോഗികള് ഏറെ നേരം ക്യൂ നിന്ന് ഫാര്മസിക്ക് മുന്നിലെത്തുമ്പോഴാണ് മരുന്നില്ലെന്ന വിവരമറിയുന്നത്.
ഒരാഴ്ചത്തേക്കുള്ള മരുന്നിന് പകരം രണ്ടു ദിവസത്തേക്കുള്ളത് കൊടുത്ത് സമാധാനിപ്പിച്ച് അയയ്ക്കുന്ന ജോലിയും ഫാര്മസി ജീവനക്കാര് ഏറ്റെടുത്തിരിക്കുകയാണ്.
അവശ്യ മരുന്നുകളുടെ വിതരണം സാങ്കേതിക കാരണങ്ങള് പറഞ്ഞ് മെഡിക്കല് സര്വീസസ് കോര്പ്പറേഷന് ഇടക്കാലത്ത് നിറുത്തിവച്ചിരുന്നു. കോര്പ്പറേഷനുമായി കരാറുള്ളതിനാല് ലോക്കല് പര്ച്ചേസ് പ്രകാരം മരുന്നു വാങ്ങാനും കഴിയില്ല. രോഗികള്ക്ക് പാരസെറ്റമോള് ഗുളിക പോലും ലഭിക്കുന്നില്ലെന്ന് പരാതിയുണ്ട്.
കിടത്തി ചികിത്സയിലുള്ള രോഗികള് വിലകൂടിയ കുത്തിവയ്പ് മരുന്നുകള് സ്വകാര്യ മെഡിക്കല് സ്റ്റോറുകളില് നിന്നു വാങ്ങേണ്ട അവസ്ഥയാണ്. ജില്ലയുടെ സമീപ പഞ്ചായത്തുകളിലെ രോഗികള് ആശ്രയിക്കുന്ന ജില്ല ജനറല് ആശുപത്രിയിലും മരുന്നുകള്ക്ക് ക്ഷാമമുണ്ട്. പാലക്കാട്, കോഴിക്കോട് ജില്ലകളില് നിന്ന് എത്തുന്നവരടക്കം മെഡിക്കല് കോളേജില് ആയിരത്തിലധികം രോഗികളാണ് ദിനംപ്രതി ഒ.പിയില് എത്തുന്നത്. ഭൂരിഭാഗം പേര്ക്കും മരുന്ന് കിട്ടുന്നില്ല. ബി.പി.എല് വിഭാഗത്തിലുള്ളവരാണ് സര്ക്കാര് ആശുപത്രികളില് കൂടുതലായും ചികിത്സ തേടിയെത്തുന്നത്.
അതിനിടെ, സാമ്പത്തിക വര്ഷം ആവശ്യമായ മരുന്നിന്റെ 40 ശതമാനത്തോളം ഓര്ഡര് കുറച്ചതും പ്രതിസന്ധി സൃഷ്ടിച്ചിട്ടുണ്ട്. കൊവിഡ് കാലത്ത് ആശുപത്രിയിലെത്തുന്ന രോഗികളുടെ എണ്ണം കുറവയായിരുന്നു. അതോടെ വിവിധയിനം മരുന്നുകള് കാലാവധി കഴിഞ്ഞ് പാഴായി. മോശമായ മരുന്നിന്റെ ബാദ്ധ്യത ഓഡിറ്റ് റിപ്പോര്ട്ടില് ഉദ്യോഗസ്ഥരുടെ ചുമലിലാകും. ഇത് ഒഴിവാക്കാന് പല ആശുപത്രികളും മരുന്നുകളുടെ ഓര്ഡര് കുറച്ചു. കൊവിഡാനന്തരം ആശുപത്രികളിലേക്ക് കേരള മെഡിക്കല് സര്വീസസ് കോര്പ്പറേഷന് ലിമിറ്റഡ് മരുന്നു വിതരണത്തില് തുടക്കത്തില് വീഴ്ചയുണ്ടായതും മരുന്നുകളുടെ ക്ഷാമം ഇരട്ടിയാക്കി.
