ചേര്പ്പ് : മൂന്ന് വര്ഷത്തിനിടയില് വീടിന്റെ നെടുംതൂണുകളായ മൂന്ന് പേരുടെ മരണം. വിധിയുടെ വേട്ടയാടലിനൊപ്പം സഹകരണ ബാങ്കിന്റെ ജപ്തിഭീഷണിയും. കടക്കെണിയില് മനംതകര്ന്ന് തെരുവിലേയ്ക്കിറങ്ങേണ്ട അവസ്ഥയിലാണ് തൃശൂര് ചേര്പ്പ് പെരുമ്പിള്ളിശ്ശേരിയിലെ പട്ടികജാതി കുടുംബം. മാതാപിതാക്കള് നഷ്ടപ്പെട്ട രണ്ട് മക്കളും അമ്മൂമ്മയുമാണ് ഇനി ഈ വീട്ടിലുള്ളത്.
അറുപത് പിന്നിട്ട അമ്മൂമ്മ ഓമന, പേരക്കുട്ടികളായ ബിരുദ വിദ്യാര്ഥി അശ്വിന്(21), അരുണ്(19) എന്നിവരാണ് ഈ വീട്ടില് ഇനിയുള്ളത്. വിധി വേട്ടയാടിയ ദുരന്തത്തിലും ജീവിതത്തോട് പോരാടുമ്പോഴാണ് ഇടിത്തീയായി വീടിന് ജപ്തിഭീഷണിയെത്തിയത്. ചേര്പ്പ് പെരുമ്പിള്ളിശേരി ചേനം വഴിയില് വാട്ടര് ടാങ്കിന് സമീപം ഗ്രീന് പാര്ക്കില് താമസിക്കുന്ന പട്ടികജാതി കുടുംബമാണ് തെരുവിലിറങ്ങേണ്ട അവസ്ഥയിലുള്ളത്.
ചേര്പ്പില് ചുമട്ടുതൊഴിലാളിയായിരുന്ന ഓമനയുടെ ഭര്ത്താവ് അയ്യപ്പന്റെ പേരിലുള്ള നാല് സെന്റ് പുരയിടം പണയപ്പെടുത്തി ഓമനയുടെ ജാമ്യത്തില് 2017ലാണ് ചേര്പ്പ് സര്വീസ് സഹകരണ ബാങ്കില് നിന്നും നാല് ലക്ഷം വായ്പയെടുത്തത്. ആദ്യഘട്ടത്തില് തിരിച്ചടവ് മുടക്കമില്ലാതെ നടന്നിരുന്നു. അയ്യപ്പനും ഓമനക്കും രണ്ട് പെണ്മക്കളാണ്. 2019 മാര്ച്ചില് കുളിമുറിയില് തലയിടിച്ച് വീണ് മകള് ബിന്ദു ചികില്സയിലിരിക്കെ മരിച്ചു.
2020 മെയ് മാസത്തില് പെട്ടന്ന് അസുഖം ബാധിച്ച് അയ്യപ്പനും മരിച്ചു. ഒടുവില് 2021 ഒക്ടോബറില് ബിന്ദുവിന്റെ ഭര്ത്താവ് പുരുഷോത്തമനും ഹൃദയാഘാതത്തെ തുടര്ന്ന് മരണപ്പെട്ടു. മൂത്ത പേരക്കുട്ടിയും വിദ്യാര്ഥിയുമായ അശ്വിന് പഠനത്തോടൊപ്പം ഊരകത്തെ സിനിമ തിയ്യറ്ററില് രാത്രി ജോലിയെടുത്ത് കിട്ടുന്ന തുച്ഛമായ വരുമാനം കൊണ്ടാണ് ഇപ്പോള് കുടുംബം കഴിയുന്നത്. ഇതിനിടെ സഹകരണ ബാങ്കില് നിന്നെടുത്ത നാല് ലക്ഷം വായ്പ ഇപ്പൊള് പലിശയടക്കം 6,10483 രൂപയായി. പണം അടച്ചില്ലെങ്കില് ജപ്തി നടപടികളിലേയ്ക്ക് കടക്കുമെന്ന് കാണിച്ച് സഹകരണ കോടതിയുടെ നോട്ടീസ് ലഭിച്ചതോടെ തെരുവിലേയ്ക്കിറങ്ങേണ്ട അവസ്ഥയിലാണ്കുടുംബം.
മരിച്ച മകള് ബിന്ദുവിന്റെ പേരില് വീടിനോട് ചേര്ന്നുള്ള മൂന്നര സെന്റ് സ്ഥലവും ഓടിട്ട ചെറിയ വീടും ഉണ്ട്. ഇത് വിറ്റ് ബാങ്കിലെ കടംവീട്ടാമെന്നാണ് ഇവര് കരുതിയത്. എന്നാല് കെ.റെയില് പദ്ധതി കടന്നുപോകുന്ന പ്രദേശമായതിനാല് ആരും വാങ്ങാനും തയ്യാറാവുന്നില്ല. സമീപത്തെ വീടും സ്ഥലവും വിറ്റ് വായ്പ അടക്കാനുള്ള സാവകാശം തേടിയെങ്കിലും ബാങ്ക് കനിഞ്ഞിട്ടില്ല.
