ന്യൂദല്‍ഹി: സ്ത്രീ ശാക്തീകരണത്തിന്റെ ഭാഗമായി 2023 മുതല്‍ അഗ്നിവീര്‍ റിക്രൂട്ട്മെന്‍റില്‍ വ്യോമസേന വനിതകള്‍ക്ക് 10 ശതമാനം സംവരണം നല്‍കുമെന്ന് വ്യോമസേ മേധാവി വി.ആര്‍.ചൗധരി.
“വനിതാ അഗ്നിവീരകളെ അടുത്ത വര്‍ഷം മുതല്‍ ഉള്‍പ്പെടുത്തും. 10 വര്‍ഷം കഴിഞ്ഞ് വ്യോമസേന അതിന്റെ 100-ാം വര്‍ഷികം ആഘോഷിക്കുമ്പോള്‍ ഈ മേഖലയെ ആധുനികവും ഭാവികാലസജ്ജവും സാങ്കേതികമായി ഉല്‍കൃഷ്ടവും ആക്കി പരിവര്‍ത്തനപ്പെടുത്താനുള്ള അവസരമാണിത്”. -വി.ആര്‍. ചൗധരി പറഞ്ഞു. “വ്യോമസേനയില്‍ സ്ത്രീകളുടെ സേവനം പ്രയോജനപ്പെടുത്താനും സമയം വരുമ്പോള്‍ അവരെ വളര്‍ത്താനും ആലോചിക്കുകയാണ്. തുറന്ന മനസ്സോടെയാണ് അവരെ വ്യോമസേനയിലേക്ക് സ്വാഗതം ചെയ്യുന്നത്.” – വ്യോമസേന മേധാവി പറഞ്ഞു.
ഒക്ടോബര്‍ എട്ടിന് വ്യോമസേന അതിന്റെ 90-ാം വാര്‍ഷികം ആഘോഷിക്കുന്നതിന് മുന്നോടിയായി നടത്തിയ വാര്‍ത്താസമ്മേളനത്തിലായിരുന്നു ഈ വെളിപ്പെടുത്തല്‍. നേരത്തെ കരസേനയും നാവിക സേനയും അഗ്നിവീരകളായി വനിതകളെ ഉള്‍പ്പെടുത്താന്‍ തീരുമാനിച്ചിരുന്നു. ജൂണ്‍ 14നാണ് കേന്ദ്രം അഗ്നിപഥ് പദ്ധതി തുടങ്ങിയത്. 2022ല്‍ 46,000 അഗ്നിവീരരെ സേനയുടെ ഭാഗമാക്കും. നാല് വര്‍ഷമാണ് ഇവരുടെ സേവന കാലാവധി. അത് കഴിഞ്ഞാല്‍ 25 ശതമാനം പേരെ നിലനിര്‍ത്തും.
പ്രതികരിക്കാൻ ഇവിടെ എഴുതുക: