തിരുവനന്തപുരം: അയല്‍വാസിയുടെ ആക്രമണത്തില്‍ പൊള‌ളലേറ്റ് ചികിത്സയിലായിരുന്ന ഗൃഹനാഥന്‍ മരിച്ചു. പള‌ളിക്കല്‍ സ്വദേശി പ്രഭാകര കുറുപ്പ്(60) ആണ് മരിച്ചത്. പാരിപ്പള‌ളി മെഡിക്കല്‍ കോളേജ് ആശുപത്രിയിൽ ചികിത്സയിലായിരുന്നു. ഭാര്യ വിമലകുമാരി(55) തീപ്പൊള‌ളലേറ്റ് ഗുരുതരാവസ്ഥയില്‍ തിരുവനന്തപുരം മെഡിക്കൽ കോളേജ് ആശുപത്രിയിൽ ചികിത്സയിലാണ്.
കിളിമാനൂര്‍ പനപ്പാംകുന്നിലാണ് സംഭവം. വിമുക്തഭടനായ ശശിധരൻ നായർ അയല്‍വാസികളായ ദമ്പതികളെ പെട്രോളൊഴിച്ച്‌ തീകൊളുത്തുകയായിരുന്നു. ശശിയുടെ മകൻ ജീവനൊടുക്കിയ കേസിലെ പ്രതിയായിരുന്നു പ്രഭാകര കുറുപ്പ്. കേസിൽ പ്രഭാകര കുറുപ്പിനെ കഴിഞ്ഞ ദിവസം കോടതി വെറുതെ വിട്ടിരുന്നു. ഇതിന്റെ പകയാണ് ക്രൂരകൃത്യത്തിന് പിന്നിൽ. 29 വർഷം മുമ്പാണ് ശശിയുടെ മകൻ ബഹ്റൈനിൽ വച്ച് ജീവനൊടുക്കിയത്.
ഹോളോ ബ്രിക്‌സ് നിര്‍മ്മാണ യൂണിറ്റ് നടത്തിവരികയായിരുന്നു പ്രഭാകര കുറുപ്പ്. ഇവരുടെ വീട്ടില്‍ പെട്രോളുമായെത്തിയ ശശി പെട്രോള്‍ പ്രഭാകര കുറുപ്പിന്റെയും വിമലകുമാരിയുടെയും ദേഹത്തൊഴിച്ച്‌ തീകൊളുത്തിയെന്നാണ് പ്രദേശവാസികളുടെ മൊഴി. ശശിധരൻ നായർക്കും പൊള്ളലേറ്റിട്ടുണ്ട്. ഇയാളുടെ പരിക്കും ഗുരുതരമാണെന്ന് പോലീസ് പറഞ്ഞു. ദമ്പതികളുടെ തലയ്‌ക്ക് ചുറ്റിക കൊണ്ട് അടിച്ചിട്ട ശേഷമാണ് തീ കൊളുത്തിയത്.
പ്രതികരിക്കാൻ ഇവിടെ എഴുതുക: