തിരുവനന്തപുരം: പൊതുമരാമത്ത് വകുപ്പിന് കീഴില് റണ്ണിങ് കോണ്ട്രാക്ട് പദ്ധതി നടപ്പിലാക്കുന്ന റോഡുകളുടെ പരിപാലനം ഉറപ്പാക്കാന് സ്ഥിരം സംവിധാനം ഏര്പ്പെടുത്തും. സ്ഥിരമായ റോഡ് പരിപാലന പരിശോധനക്കുള്ള ഉന്നത ഉദ്യോഗസ്ഥ സംഘത്തെയാണ് നിയോഗിക്കുന്നത്. പൊതുമരാമത്ത് വകുപ്പ് സെക്രട്ടറിയുടെ നേതൃത്വത്തില് നിലവില് പ്രത്യേക സംഘം ജില്ലകളില് പരിശോധന നടത്തി വരികയാണ്.
ഈ സംഘം പരിശോധനക്ക് ശേഷം നല്കുന്ന റിപ്പോര്ട്ട് വിലയിരുത്തിയാകും തുടര്നടപടികള് സ്വീകരിക്കുക. ചുമതലയുള്ള റോഡുകളില് പൊതുമരാമത്ത് വകുപ്പ് ഉദ്യോഗസ്ഥര് സമയബന്ധിതമായി പരിശോധന നടത്തി പോരായ്മകള് കണ്ടെത്തി പരിഹരിക്കുവാനുള്ള സ്ഥിരം സംവിധാനം രൂപീകരിക്കുവാനാണ് ഉദ്ദേശിക്കുന്നത്. ഉദ്യോഗസ്ഥര് സമയബന്ധിതമായി ഫീല്ഡില് പോയി പരിശോധന നടത്തണം എന്ന പ്രധാന ഉത്തരവാദിത്തം നിര്വ്വഹിക്കുവാനാകും.
പ്രത്യേക സംഘം കണ്ണൂര്, കോഴിക്കോട്, മലപ്പുറം, തൃശൂര് ജില്ലകളില് വെള്ളിയാഴ്ച പരിശോധന നടത്തി. ജില്ലകളില് രണ്ട് ടീമായി തിരിഞ്ഞാണ് പരിശോധന. ഈ ജില്ലകളില് റണ്ണിംഗ് കോണ്ട്രാക്ടില് ഉള്പ്പെടുത്തിയ റോഡുകളില് നിലവില് നടത്തിയ പ്രവൃത്തി സംഘം പരിശോധിച്ചു. റോഡുകളുടെ നിലവിലുള്ള സ്ഥിതിയും സംഘം വിലയിരുത്തുന്നുണ്ട്. തിരുവനന്തപുരം, ഇടുക്കി, എറണാകുളം ജില്ലകളിലെ പരിശോധന കഴിഞ്ഞ ദിവസം പൂര്ത്തിയാക്കിയിരുന്നു.
കൊല്ലം, പത്തനംതിട്ട, ആലപ്പുഴ, എന്നീ ജില്ലകളിലും പരിശോധന പുരോഗമിക്കുന്നുണ്ട്. കാസര്ഗോഡ്, പാലക്കാട്, കോട്ടയം, വയനാട് ജില്ലകളില് അടുത്ത ദിവസങ്ങളില് പരിശോധന നടത്തും. വകുപ്പിലെ നോഡല് ഓഫീസര് ചുമതലയിലുള്ള ഐ.എ.എസ് ഓഫീസര്മാര്, ചീഫ് എന്ജിനിയര്മാര്, സൂപ്രണ്ടിംഗ് എന്ജിനിയര്മാര്, എക്സിക്യൂട്ടിവ് എന്ജിനിയര്മാര് എന്നിവരാണ് പരിശോധനാ സംഘത്തിലുള്ളത്. ഇതോടൊപ്പം ക്വാളിറ്റി കണ്ട്രോള് വിംഗിലെ ഉദ്യോഗസ്ഥരും പരിശോധക സംഘത്തിലുണ്ട്.
