തിരുവനന്തപുരം : ഗവര്ണര് ആരിഫ് മുഹമ്മദ് ഖാനെതിരെ പ്രമേയം കൊണ്ടുവരാന് നീക്കവുമായി കേരള സര്വകലാശാല. ഇന്ന് ചേരുന്ന സെനറ്റ് യോഗത്തില് ഗവര്ണര്ക്കെതിരെ പ്രമേയം കൊണ്ടുവരാനാണ് നീക്കം. വിസി നിയമനത്തില് ഏകപക്ഷീയമായി ഗവര്ണര് സേര്ച്ച് കമ്മിറ്റി ഉണ്ടാക്കിയെന്ന് ആരോപിച്ചാണ് നടപടി.
സര്വ്വകലാശാലകളിലെ ചട്ട ലംഘനങ്ങളില് ഗവര്ണര് നടപടി കര്ശ്ശനമാക്കിയതോടെയാണ് ഇപ്പോള് കേരള സര്വകലാശാല ആരിഫ് മുഹമ്മദ് ഖാനെതിരെ തിരിഞ്ഞിരിക്കുന്നത്. പ്രമേയം വന്നാല് കേരള വിസിക്ക് എതിരെ ഗവര്ണര് നടപടി എടുത്തേക്കും. നിലവില് വിസി നിയമനത്തിനായി ഗവര്ണര് രൂപീകരിച്ച സേര്ച്ച് കമ്മിറ്റിയിലേക്ക് സര്വകലാശാല ഇതുവരെ നോമിനിയെ നല്കിയിട്ടില്ല.
അതേസമയം കെകെ രാഗേഷിന്റെ ഭാര്യ പ്രിയ വര്ഗീസിന്റെ നിയമനത്തില് കണ്ണൂര് വൈസ് ചാന്സലര്ക്ക് എതിരെ ഗവര്ണര് ഉടന് നടപടിയിലേക്ക് നീങ്ങും. വിസിക്ക് കാരണം കാണിക്കല് നോട്ടീസ് നല്കി വിശദീകരണം ലഭിച്ച ശേഷം തുടര് നടപടിയിലേക്ക് പോകാനാണ് തീരുമാനം.
നിയമനം സ്റ്റേ ചെയ്തതിനെതിരെ സര്വകലാശാല എടുക്കുന്ന നിയമ നടപടിയും രാജ് ഭവന് നിരീക്ഷിക്കുന്നുണ്ട്. ദല്ഹിയില് നിന്നും ഗവര്ണര് തിരിച്ചെത്തിയശേഷം നടപടികള് കൈക്കൊള്ളുമെന്നാണ് റിപ്പോര്ട്ട്. പ്രിയ വര്ഗീസിന്റെ നിയമനത്തില് ഗുരുതര വീഴ്ച വിസിയുടെ ഭാഗത്തുനിന്ന് ഉണ്ടായെന്നാണ് രാജ്ഭവന് ലഭിച്ച നിയമോപദേശം.
