കൊച്ചി : ദിലീപിന്റെ ഫാന്സ് അസോസിയേഷന്റെ ഒരു ഭാരവാഹി അതിലുണ്ട്. ദിലീപിന്റെ ഏറ്റവും അടുത്ത ഒരു സുഹൃത്തും തനിക്കെതിരായ പീഡന പരാതിക്ക് പിന്നില് പ്രവര്ത്തിച്ചിട്ടുണ്ടെന്ന് സംവിധായകന് ബാലചന്ദ്ര കുമാര്. ലൈംഗിക പീഡനാരോപണത്തില് സംവിധായകനെതിരെ തെളിവുകള് ഇല്ലെന്നും ആരോപണം വ്യാജമാണെന്ന പോലീസ് റിപ്പോര്ട്ട് പുറത്തുവന്നതില് സംസാരിക്കുകയായിരുന്നു അദ്ദേഹം.
തനിക്കെതിരായ ലൈംഗിക പീഡന പരാതിക്ക് പിന്നില് നടന് ദിലീപിന്റെ സുഹൃത്തുക്കളാണ്. ദിലീപിന് വേണ്ടി ചാനലില് വന്നിരുന്ന് ഘോരഘോരം പ്രസംഗിച്ച ഒരാള്ക്കും ഒരു ഓണ്ലൈന് മാധ്യമ സ്ഥാപനത്തിന്റെ ഉടമയ്ക്കും ഇതില് പങ്കുണ്ട്.
‘തനിക്കെതിരായ ലൈംഗിക പീഡന പരാതി വ്യാജമാണെന്ന പോലീസ് റിപ്പോര്ട്ടില് വളരെയധികം സന്തോഷമുണ്ട്. തന്നെ അത്ഭുതപ്പെടുത്തുന്ന കാര്യം ഇത് കേരളത്തിലാണ് ഇതൊക്കെ നടക്കുന്നതാണെന്നതാണ്. പരാതിക്കാരിയെ തനിക്ക് അറിയില്ല. എഫ്ഐആര് വഴി പരാതിക്കാരിയുടെ പേരും വിലാസവും മാത്രമാണ് അറിയാമായിരുന്നത്. അന്വേഷണത്തില് അവര് പല സ്ഥലത്ത് പല പേരുകളില് പല പ്രായത്തിലാണ് പ്രവര്ത്തിച്ചതെന്നാണ് കണ്ടെത്തിയത്.
അവരുടെ ഫോട്ടോ പോലും കണ്ടിട്ടില്ല. അത്തരത്തിലൊരാള് ഇങ്ങനെ പരാതി നല്കുമ്പോള് ചത്തത് കീചകനെങ്കില് കൊന്നത് ഭീമന് എന്ന നിലയിലാണ്. താന് ദിലീപിനെതിരെ മൊഴി കൊടുത്തത് കൊണ്ടാണ് കേസ് വന്നത്. തന്നെ അറസ്റ്റ് ചെയ്താല് ആലുവ സബ് ജയിലില് റിമാന്ഡ് ചെയ്യും. അവരുടെ കൈയ്യകലത്തില് തന്നെ കിട്ടാനായിരുന്നു ശ്രമമെന്നും ബാലചന്ദ്ര കുമാര് പറഞ്ഞു.
എന്നോട് ശത്രുതയുണ്ടായിരുന്ന ആളുടെ സുഹൃത്തുക്കള് ചേര്ന്ന് നടത്തിയ നീക്കമായിരുന്നു ഇത്. സംഭവത്തില് നിയമപരമായി ഏതറ്റം വരെയും പോകാന് താന് തയ്യാറാണ്. സത്യം പറയുന്നവന് ഒരു വാക്കേ പറയാനാവൂവെന്നും ബാലചന്ദ്ര കുമാര് കൂട്ടിച്ചേര്ത്തു.
