വടക്കഞ്ചേരി: സിപിഎം ഭരണത്തിലുള്ള കണ്ണമ്പ്ര സര്വീസ് സഹകരണ ബാങ്കില് അഞ്ചേമുക്കാല് കോടിയിലധികം രൂപയുടെ ക്രമക്കേട് നടന്നതായി അന്വേഷണ റിപ്പോര്ട്ട്. സെക്രട്ടറിയും ജീവനക്കാരും ഭരണസമിതി അംഗങ്ങളും ചേര്ന്ന് പണം തിരിച്ചടക്കണമെന്ന് സഹകരണ വകുപ്പിന്റെ ഉത്തരവ്.
കണ്ണമ്പ്ര റൈസ് പാര്ക്കിന് സമീപം ഭൂമി വാങ്ങിയതില് ബാങ്കിന് കൂടി പങ്കാളിത്തമുണ്ടായിരുന്ന പാപ്കോസ് വഴി നടത്തിയ കോടികളുടെ അഴിമതിയായിരുന്നു ആദ്യ വിവാദം. പാര്ട്ടി കമ്മീഷന്റെ അന്വേഷണത്തില് ബാങ്ക് സെക്രട്ടറി ആര്. സുരേന്ദ്രന്റെ പങ്ക് തെളിഞ്ഞതോടെ സിപിഎം ഇദ്ദേഹത്തെ പുറത്താക്കി. സുരേന്ദ്രന്റെ ബന്ധുകൂടിയായ ജില്ലാ നേതാവിനെ തരംതാഴ്ത്തുകയും ചെയ്തു. എന്നാല് ബാങ്കുമായി ബന്ധപ്പെട്ട ക്രമക്കേടുകളില് കൂടുതലാളുകള്ക്ക് പങ്കുണ്ടെന്നാണ് അസി.രജിസ്ട്രാര് നടത്തിയ അന്വേഷണത്തില് തെളിഞ്ഞത്.
5,76,57,751 രൂപയുടെ ക്രമക്കേടുണ്ടെന്നാണ് കണ്ടെത്തല്. ഇത് സെക്രട്ടറിയും ജീവനക്കാരും നേരത്തെയും ഇപ്പോഴത്തെയും ഭരണസമിതി അംഗങ്ങളും ചേര്ന്ന് തിരിച്ചടയ്ക്കണം. ഭരണവകുപ്പിന്റെ അനുമതി തേടാതെ പൊതുജനങ്ങളില് നിന്ന് നിക്ഷേപമായി വാങ്ങിയ അഞ്ചുകോടിയിലധികം രൂപ കെട്ടിട നിര്മാണത്തിനായി വിനിയോഗിച്ചു. ഊരാളുങ്കല് സൊസൈറ്റിക്ക് അനുമതിയില്ലാതെ ഒരു കോടി രൂപ മുന്കൂറായി നിര്മാണപ്രവര്ത്തനങ്ങള്ക്ക് നല്കി. കര്ഷകസേവന കേന്ദ്രം നടത്തിപ്പില് ക്രമക്കേട്. സ്ഥിരനിക്ഷേപം വകമാറ്റി. ഓണച്ചന്ത നടത്തിപ്പിലെ നഷ്ടം, കിട്ടിയ പണം കൃത്യസമയത്ത് ബാങ്കിലടയ്ക്കാതെ കൈവശം വെച്ചത് തുടങ്ങി നിരവധി ക്രമക്കേടുകളാണ് കണ്ടെത്തിയിട്ടുള്ളത്.
കര്ഷകരും സാധാരണക്കാരുമുള്പ്പെടെയുള്ളവര് ഏറെ ആശ്രയിക്കുന്ന കണ്ണമ്പ്ര ബാങ്കിന്റെ നിലവിലെ പ്രവര്ത്തനത്തില് സിപിഎം നേതൃത്വവും കടുത്ത അതൃപ്തിയിലാണ്. റിപ്പോര്ട്ട് പരിഗണിച്ച് കൂടുതല് ജീവനക്കാര്ക്കെതിരെ കടുത്ത നടപടിക്ക് ശുപാര്ശ ചെയ്യുമെന്ന് സഹകരണ മന്ത്രിയുടെ ഓഫീസ് അറിയിച്ചു.
