മങ്കൊമ്പ്: സംസ്ഥാനത്തെ ജലമേളകള്ക്ക് തുടക്കം കുറിച്ച് ചരിത്രപ്രസിദ്ധമായ ചമ്പക്കുളം മൂലം ജലോത്സവം 12ന് ചമ്പക്കുളത്താറ്റില്. അമ്പലപ്പുഴ ശ്രീകൃഷ്ണസ്വാമി ക്ഷേത്ര പ്രതിഷ്ഠയുമായി ബന്ധപ്പെട്ടാണ് വള്ളംകളിക്ക് തുടക്കം. മത്സര വള്ളംകളിക്കു മുന്നോടിയായി തിരുവിതാംകൂര് ദേവസ്വം അധികാരികളുടെ നേതൃത്വത്തില് മഠത്തില് ക്ഷേത്രം, മാപ്പിളശേരി തറവാട്, കല്ലൂര്ക്കാട് ബസിലിക്ക എന്നിവിടങ്ങളില് ആചാരാനുഷ്ഠാനങ്ങളോടെ ചടങ്ങുകളുമുണ്ട്.
ഉച്ചകഴിഞ്ഞ് 2.10ന് മന്ത്രി പി. പ്രസാദ് ജലമേള ഉദ്ഘാടനം ചെയ്യും. തോമസ്.കെ. തോമസ് എംഎല്എ അധ്യക്ഷനാകും. മൂലം ജലോത്സവ സമിതി ചെയര്മാനും, സബ് കളക്ടറുമായ സൂരജ് ഷാജി സ്വാഗതം പറയും. തിരുവിതാംകൂര് ദേവസ്വം ബോര്ഡ് അമ്പലപ്പുഴ അസിസ്റ്റന്റ് കമ്മിഷണര് ജെ. ആശാകുമാരി, ചമ്പക്കുളം കല്ലൂര്ക്കാട് സെന്റ്. മേരീസ് ബസിലിക്ക റെക്ടര് ഫാ. ഗ്രിഗറി ഓണംകുളം എന്നിവര് ചേര്ന്ന് ഭദ്രദീപ പ്രകാശനകര്മം നിര്വഹിക്കും. 2.30ന് കളിവള്ളങ്ങളുടെ ജലഘോഷയാത്ര കൊടിക്കുന്നില് സുരേഷ് എംപി ഫ്ളാഗ് ഓഫ് ചെയ്യും.
മൂന്നിന് മത്സര വള്ളംകളി ആരംഭിക്കും. മത്സര ഇടവേളയില് സാസ്കാരിക സമ്മേളനം ജില്ലാ പഞ്ചായത്ത് പ്രസിഡന്റ് കെ.ജി. രാജേശ്വരി ഉദ്ഘാടനം ചെയ്യും. സമാപന സമ്മേളന ഉദ്ഘാടനവും വിജയികള്ക്കുള്ള സമ്മാനദാനവും തിരുവിതാംകൂര് ദേവസ്വം ബോര്ഡ് പ്രസിഡന്റ് കെ. അനന്തഗോപന് നിര്വഹിക്കും. ഒന്പതു ചുണ്ടന് വള്ളങ്ങളാണ് ഇത്തവണ രാജപ്രമുഖന് ട്രോഫിക്കായി മാറ്റുരയ്ക്കുക.
