ന്യൂദല്ഹി: 26 കാരിയായ ദളിത് യുവതിയുടെ പരാതിയില് കോണ്ഗ്രസ് അധ്യക്ഷ സോണിയാ ഗാന്ധിയുടെ പേഴ്സണല് സെക്രട്ടറി പി.പി. മാധവനെതിരെ ദല്ഹി പോലീസ് ബലാത്സംഗത്തിനും ഭീഷണിപ്പെടുത്തിയതിനും കേസെടുത്തു. ജോലി നല്കാമെന്ന് വാഗ്ദാനം നല്കിയാണ് 71 വയസുകാരനായ പ്രതി തന്നെ ബലാത്സംഗം ചെയ്തതെന്നും വിവാഹ വാഗ്ദാനം നല്കിയെന്നും യുവതി ആരോപിച്ചു.
ഇരയെ ബലാത്സംഗം ചെയ്തെന്നും ഇക്കാര്യം പറഞ്ഞാല് ഗുരുതരമായ പ്രത്യാഘാതങ്ങള് നേരിടേണ്ടിവരുമെന്ന് പ്രതി ഭീഷണിപ്പെടുത്തിയതായും പരാതിയില് പറയുന്നു. ‘ജൂണ് 25 ന് ഉത്തം നഗര് പോലീസ് സ്റ്റേഷനില് പരാതി ലഭിച്ചു. ഇന്ത്യന് ശിക്ഷാ നിയമത്തിലെ സെക്ഷന് 376 (ബലാത്സംഗം), 506 (ക്രിമിനല് ഭീഷണിപ്പെടുത്തല്) എന്നിവ പ്രകാരം കേസ് രജിസ്റ്റര് ചെയ്തിട്ടുണ്ടെന്നും വിഷയം അന്വേഷിക്കുകയാണെന്നും ദ്വാരക ഡെപ്യൂട്ടി പോലീസ് കമ്മീഷണര് എം. ഹര്ഷ വര്ദ്ധന് പറഞ്ഞു.
രാഷ്ട്രീയ നേതാവിന്റെ പേര് ഡിസിപി വെളിപ്പെടുത്തിയില്ലെങ്കിലും മാധവനെതിരെയാണ് ആരോപണങ്ങള് ഉന്നയിച്ചതെന്ന് ദല്ഹി പോലീസ് ഉദ്യോഗസ്ഥര് പറഞ്ഞു. യുവതി ദല്ഹിയിലാണ് താമസിക്കുന്നതെന്നും അവരുടെ ഭര്ത്താവ് 2020ല് മരിച്ചുവെന്നും ഉദ്യോഗസ്ഥര് പറഞ്ഞു. ഭര്ത്താവ് കോണ്ഗ്രസ് പാര്ട്ടി ഓഫീസിലാണ് ജോലി ചെയ്തിരുന്നതെന്നും അവിടെ ഹോര്ഡിംഗുകള് പതിക്കുന്ന ജോലിയാണ് ചെയ്തിരുന്നതെന്നും പോലീസ് വ്യക്തമാക്കി.
