കണ്ണൂര് : വിമാനത്തിനുള്ളില് മുഖ്യമന്ത്രിക്കെതിരേ പ്രതിഷേധിച്ച അധ്യാപകനെ സസ്പെന്ഡ് ചെയ്തു. യൂത്ത് കോണ്ഗ്രസ് മട്ടന്നൂര് മണ്ഡലം പ്രസിഡന്റും മുട്ടന്നൂര് എയുപി സ്കൂളിലെ അധ്യാപകനുമായ ഫര്സീന് മജീദി(28)നെ അന്വേഷണ വിധേയമായാണ് സസ്പെന്ഡ് ചെയ്തിരിക്കുന്നത്. 15 ദിവസത്തേയ്ക്കാണ് നടപടി.
ഫര്സീന് തിങ്കളാഴ്ച രാവിലെ ജോലിക്ക് ഹാജരായിരുന്നു. തുടര്ന്ന് ഉച്ചയ്ക്ക് ശേഷം അവധിക്ക് അപേക്ഷിക്കുകയും ഇത് അനുവദിച്ചതായും സ്കൂളിലെ രേഖകളിലുണ്ട്. ഉച്ചയ്ക്ക് ശേഷം അവധിയെടുത്ത് മുഖ്യമന്ത്രിക്കെതിരെ പ്രതിഷേധ പ്രകടനം നടത്തിയ ഇയാളെ സ്കൂളില് നിന്നും പുറത്താക്കണമെന്ന് ആവശ്യം ഉയര്ന്നിരുന്നു. അതിനുപിന്നാലെയാണ് ഫര്സീനെ സസ്പെന്ഡ് ചെയ്തിരിക്കുന്നത്.
സംഭവത്തില് ചൊവ്വാഴ്ച ഡിഡിഇ സ്കൂളിലെത്തി പരിശോധന നടത്തിയിരുന്നു. ഫര്സീന് തിങ്കളാഴ്ച രാവിലെ സ്കൂളില് ജോലിക്കെത്തിയിരുന്നു. ഉച്ചയ്ക്ക് ശേഷം അവധിക്ക് അപേക്ഷിക്കുകയും ഇത് അനുവദിച്ചതിന്റെ രേഖകളും ഡിഡിഇ കണ്ടൈത്തിയിട്ടുണ്ട്. ഇതിനുപിന്നാലെ അധ്യാപകനെ സസ്പെന്ഡ് ചെയ്തതായി മാനേജ്മെന്റ് അറിയിക്കുകയായിരുന്നു.
ഫര്സീന് തിരുവനന്തപുരത്ത് പോലീസ് കസ്റ്റഡിയിലായതിന് പിന്നാലെ നിരവധി കുട്ടികളുടെ രക്ഷിതാക്കള് സ്കൂളിലെത്തി ടിസിക്ക് അപേക്ഷ നല്കി. ഈ സാഹചര്യത്തിലാണ് മാനേജ്മെന്റ് അതിവേഗം നടപടികളിലേക്ക് കടന്നത്. മുഖ്യമന്ത്രിക്കെതിരേ പ്രതിഷേധിച്ച് പോലീസ് കസ്റ്റഡിയിലായെന്ന വാര്ത്തകളുടെ അടിസ്ഥാനത്തിലാണ് 15 ദിവസത്തേക്ക് അധ്യാപകനെ സസ്പെന്ഡ് ചെയ്തതെന്നാണ് മാനേജ്മെന്റിന്റെ വിശദീകരണം.
