ന്യൂദല്ഹി: സഹകരണ സ്ഥാപനങ്ങളെ ഉപഭോക്താക്കളായി പരിഗണിച്ച് സംഭരണം അനുവദിക്കുന്നതിന്ഗവ. ഇ -മാര്ക്കറ്റ്പ്ലേസ് – സ്പെഷല് പര്പ്പസ് വെഹിക്കിള് (ജിഇഎം – എസ്പിവി) വിപുലീകരിക്കാന് കേന്ദ്രമന്ത്രിസഭായോഗത്തിന്റെ അനുമതി. രജിസ്റ്റര് ചെയ്ത 8.54 ലക്ഷത്തിലധികം സഹകരണസംഘങ്ങള്ക്കും 27 കോടി അംഗങ്ങള്ക്കും ഇതിന്റെ പ്രയോജനം ലഭിക്കും. എല്ലാ ഉപഭോക്താക്കള്ക്കും വില്പ്പനക്കാര്ക്കും ജിഇഎം പോര്ട്ടല് ഉപയോഗിക്കാം.
സഹകരണ സംഘങ്ങളുടെ ലിസ്റ്റ് ജിഇഎം-എസ്പിവിയുമായി കൂടിയാലോചിച്ച് സഹകരണ മന്ത്രാലയം തീരുമാനിക്കും. ജിഇഎം പ്ലാറ്റ്ഫോം ഉപയോഗിക്കുന്നതിന് സഹകരണ സംഘങ്ങളെ പ്രോത്സാഹിപ്പിക്കുന്നതിന് സഹകരണ മന്ത്രാലയം ആവശ്യമായ നിര്ദേശങ്ങള് നല്കും. 2016 ആഗസ്ത് ഒന്പതിനാണ് ഗവ. ഇ മാര്ക്കറ്റ് പ്ലേസിന് കേന്ദ്ര വാണിജ്യ വ്യവസായ മന്ത്രാലയം തുടക്കം കുറിച്ചത്.
2017 മെയ് 17ന് ദേശീയ പൊതു സംഭരണ പോര്ട്ടലായി ജിഇഎം-എസ്പിവി എന്ന പേരില് സ്പെഷല് പര്പ്പസ് വെഹിക്കിളിന് രൂപംനല്കി. കേന്ദ്ര-സംസ്ഥാന മന്ത്രാലയങ്ങള്, വകുപ്പുകള്, പൊതുമേഖലാ സംരംഭങ്ങള്, സ്വയംഭരണ സ്ഥാപനങ്ങള്, തദ്ദേശ സ്ഥാപനങ്ങള് മുതലായവ ഇതില് ഉള്പ്പെടുന്നു. നിലവിലുള്ള ഉത്തരവനുസരിച്ച്, സ്വകാര്യ മേഖലയിലെ ഉപഭോക്താക്കള്ക്ക് ജിഇഎം സൗകര്യം ലഭ്യമല്ല. വിതരണക്കാര് (വില്പ്പനക്കാര്) ഗവ. മേഖലയില് നിന്നോ സ്വകാര്യ മേഖലയില് നിന്നോ ആകാം.
