ചണ്ഡീഗഢ്: ഉയര്ന്ന പദവിയിലുള്ള വ്യക്തികളുടെ സുരക്ഷ പിന്വലിച്ചതിന് പിന്നാലെ അവര് കൊല്ലപ്പെട്ടാല് സംസ്ഥാനത്തെ മുഖ്യമന്ത്രിമാരേയും പ്രതിചേര്ക്കുന്ന നിയമ നിര്മ്മാണം രാജ്യത്ത് വേണമെന്ന് ബിജെപി നേതാവ് സുബ്രഹ്മണ്യന് സ്വാമി. പഞ്ചാബി ഗായകനും കോണ്ഗ്രസ് നേതാവുമായ സിദ്ധു മൂസേവാലയുടെ കൊലപാതകത്തിന്റെ പശ്ചാത്തലത്തിലായിരുന്നു അദ്ദേഹത്തിന്റെ പരാമര്ശം.
മൂസേവാലയുടെ കൊലപാതകം സാധ്യമായത് അദ്ദേഹത്തിന്റെ സുരക്ഷ പിന്വലിച്ചതിന് പിന്നാലെയാണ്. 2003-ല് ഗുജറാത്ത് മുന് ആഭ്യന്തര മന്ത്രിയായിരുന്ന ഹരേന് പാണ്ഡ്യ കൊല്ലപ്പെട്ടതും അദ്ദേഹത്തിന്റെ സുരക്ഷ പിന്വലിച്ചതിന് പിന്നാലെയായിരുന്നു. ഇത്തരത്തിലുള്ള കൊലപാതകങ്ങളുണ്ടാകുമ്പോള് അതാത് സംസ്ഥാനത്തിന്റെ മുഖ്യമന്ത്രിയേയും ആഭ്യന്തരമന്ത്രിയേയും പ്രതിചേര്ത്തു കൊണ്ട് നിയമനിര്മ്മാണം നടത്തണം എന്നായിരുന്നു സുബ്രഹ്മണ്യന് സാമി പറഞ്ഞത്.
ഹരേന് പാണ്ഡ്യ കൊല്ലപ്പെടുന്ന സമയത്ത് ഗുജറാത്ത് മുഖ്യമന്ത്രി നരേന്ദ്ര മോദിയായിരുന്നു. ആഭ്യന്തരമന്ത്രി അമിത് ഷായും. ഹരേന് പാണ്ഡ്യയുടെ പേര് പ്രത്യേകം പരാമര്ശിച്ചു കൊണ്ടായിരുന്നു സുബ്രഹ്മണ്യന് സ്വാമിയുടെ പരാമര്ശം എന്നത് ഏറെ ശ്രദ്ധേയമാണ്. പകല്വെളിച്ചത്തിലായിരുന്നു സിദ്ധു മൂസേവാല നടുറോഡില്വെച്ച് വെടിയേറ്റ് കൊല്ലപ്പെടുന്നത്. സംഭവം നടന്ന സമയത്ത് അദ്ദേഹത്തിന് ഒപ്പമുണ്ടായിരുന്ന രണ്ടുപേര്ക്ക് പരിക്കേല്ക്കുകയും ചെയ്തിരുന്നു. സംസ്ഥാനത്തെ വി.ഐ.പി. സംസ്കാരം അവസാനിപ്പിക്കുന്നതിന്റെ ഭാഗമായി, ഭഗവന്ത് മന് സര്ക്കാര് സിദ്ധു ഉള്പ്പെടെ 424 പേര്ക്ക് നല്കിവന്നിരുന്ന സുരക്ഷ പിന്വലിച്ചിരുന്നു. ഇതിന് തൊട്ടുപിറ്റേന്നാണ് സിദ്ധുവിനെതിരേ ആക്രമണം നടന്നത്. ജവാഹര് കേ ഗ്രാമത്തിലേക്കുള്ള യാത്രയ്ക്കിടെയാണ് സിദ്ധുവിനു നേര്ക്ക് ആക്രമണമുണ്ടായത്.
