ഇംഗ്ലീഷ് ബസാര്: പശ്ചിമ ബംഗാളിലെ മാള്ഡ ജില്ലയില് ത്രിണമൂല് കോണ്ഗസിന്റെ രണ്ട് വിഭാഗങ്ങള് ഏറ്റുമുട്ടലില് വന്നാശനഷ്ടം. തെരുവീധികളില് നടന്ന ബോംബേറുകളും വീടുകള്ക്ക് നേരെയുള്ള ആക്രമണവും ജനത്തെ ഭീതിയില് ആഴ്ത്തി.
ഇന്ന് മണിക്ചക് ബ്ലോക്കിലെ ഗോപാല്പൂര് ബലുതോല പ്രദേശത്ത് പഞ്ചായത്ത് സമിതി ഭാരവാഹി സൈഫുദ്ദീന് ഷെയ്ഖിന്റെ നേതൃത്വത്തിലുള്ള ഒരു സംഘം ടിഎംസി പ്രവര്ത്തകര് പാര്ട്ടി ഏരിയ പ്രസിഡന്റ് നസീര് അലിയുടെ നേതൃത്വത്തിലുള്ള വിഭാഗവുമായി ഏറ്റുമുട്ടുന്നതിനിടെയാണ് സംഭവം.
ആക്രമണത്തിന്റെ ഭാഗമായി ബോംബുകള് എറിയുകയും 12 വീടുകളെങ്കിലും തകര്ക്കപ്പെടുകയും ചെയ്തതായി പോലീസ് പറഞ്ഞു. പ്രദേശത്ത് വന് പോലീസ് സന്നാഹത്തെ വിന്യസിച്ചിട്ടുണ്ടെന്നും വ്യക്തമാക്കി. എന്നാല്, ഇതുവരെ ആരെയും അറസ്റ്റ് ചെയ്തിട്ടില്ലെന്ന് പോലീസ് പറഞ്ഞു. ഭൂമിയുടെ കാര്യത്തില് ഇരു നേതാക്കളും തമ്മില് പഴയ വൈരാഗ്യമുണ്ടെന്നും ഇത് നേരത്തെ അക്രമത്തിന് കാരണമായെന്നും മണിച്ചക്കിന്റെ ടിഎംസി എംഎല്എ സാബിത്രി മിത്ര പറഞ്ഞു. ഇതിന് ടിഎംസിയുമായി ബന്ധമില്ലെന്നും പാര്ട്ടി അവകാശപ്പെട്ടു.
