ബെംഗളൂരു: കരാര് ജോലികളില് സ്ത്രീകള്ക്ക് 33 ശതമാനം സംവരണം ഉറപ്പാക്കി കര്ണാടക സര്ക്കാര്. സര്ക്കാര് ജോലിയില് കൂടുതല് സ്ത്രീകളെ ഉള്പ്പെടുത്തുന്നതിനുള്ള ബിജെപി സര്ക്കാരിന്റെ സുപ്രധാന നീക്കത്തിന്റെ ഭാഗമായാണിത്. എല്ലാ കരാര് ജോലികളിലും സ്ത്രീകള്ക്ക് സംവരണം ഉറപ്പാക്കണമെന്ന് എല്ലാ വകുപ്പുകളോടും മുഖ്യമന്ത്രി ബസവരാജ് ബൊമ്മൈ നിര്ദേശിച്ചു.
ഡ്രൈവര്മാര്, ഡാറ്റാ എന്ട്രി ഓപ്പറേറ്റര്മാര്, ഹൗസ് കീപ്പിങ് സ്റ്റാഫ്, ഗ്രൂപ്പ് ഡി ജീവനക്കാര് എന്നിവരെ സര്ക്കാര് സ്ഥിരമായി കരാര് അടിസ്ഥാനത്തിലാണ് നിയമിക്കാറുള്ളത്. നിലവില് 4.6 ലക്ഷം ജീവനക്കാരുള്ള കര്ണാടകയില് അനുവദിച്ച തസ്തികകളില് 1.5 ലക്ഷം കരാര് അടിസ്ഥാനത്തിലുള്ള ജീവനക്കാരുണ്ട്.
ഇതില് 50,000 തസ്തികകള് വനിതാ ജീവനക്കാര്ക്കായി സംവരണം ചെയ്യും. സര്ക്കുലറില് വ്യക്തമാക്കിയിട്ടുള്ള ജീവനക്കാരെ നിയമിക്കുന്നതിനുള്ള ടെന്ഡര് രേഖകളില് ഇക്കാര്യം വ്യക്തമായി രേഖപ്പെടുത്തണം. സ്വയംഭരണ സ്ഥാപനങ്ങള്ക്കും സര്വകലാശാലകള്ക്കും തദ്ദേശ സ്ഥാപനങ്ങള്ക്കും മറ്റ് സര്ക്കാര് ഓഫീസുകള്ക്കും ഇത് ബാധകമാണെന്നും മുഖ്യമന്ത്രി പറഞ്ഞു.
