തിരുവനന്തപുരം: ആഞ്ചാം ദിവസവും സംസ്ഥാനത്ത് കനത്ത മഴ തുടരുന്നു. ഇന്ന് ഏഴ് ജില്ലകളില് ഓറഞ്ച് അലേര്ട്ട് പ്രഖ്യപിച്ചിട്ടുണ്ട്. തൃശ്ശൂര് മുതല് കാസര്കോട് വരെയുള്ള ഏഴ് ജില്ലകളിലാണ് ഇന്ന് തീവ്രമഴ മുന്നറിയിപ്പ്. അതേസമയം ആലപ്പുഴ, എറണാകുളം, കോട്ടയം, ഇടുക്കി ജില്ലകളില് യെല്ലോ അലര്ട്ടും പ്രഖ്യാപിച്ചു.
അറബിക്കടലിനും കേരളത്തിന് മുകളിലുമായി നിലനില്ക്കുന്ന ചക്രവാതച്ചുഴിയെ തുടര്ന്ന് മധ്യ കേരളത്തിലും വടക്കന് കേരളത്തിലും കൂടുതല് മഴ പ്രതീക്ഷിക്കുന്നതായി അധികൃതര് അറിയിച്ചു. ബംഗാള് ഉള്ക്കടലിലെ ചക്രവാതച്ചുഴിയും കേരളം മുതല് വിദര്ഭ വരെ നിലനില്ക്കുന്ന ന്യുനമര്ദ്ദ പാത്തിയും ശക്തമായ പടിഞ്ഞാറന് കാറ്റിനും മഴയുടെ ശക്തി കൂട്ടും. അടുത്ത രണ്ട് ദിവസം കൂടി വ്യാപക മഴ ലഭിക്കുമെന്നാണ് കാലാവസ്ഥാ നിരീക്ഷണ കേന്ദ്രത്തിന്റെ അറിയിപ്പ്.
ഇതേതുര്ന്ന് മത്സ്യത്തൊഴിലാളികള് കടലില് പോകരുതെന്നും മുന്നറിയിപ്പ് നല്കിയിട്ടുണ്ട്. കേരളത്തിലേക്ക് നീങ്ങുന്ന കാലവര്ഷം മധ്യകിഴക്കന് ബംഗാള് ഉള്ക്കടലിലേക്കും ആന്ഡമാന് ദ്വീപ് സമൂഹങ്ങളിലേക്ക് അടുത്ത രണ്ടു ദിവസത്തിനുള്ളില് പൂര്ണമായും എത്തിച്ചേരും. മെയ് 27ഓടെ കാലവര്ഷം കേരളത്തിലെത്തും എന്നാണ് കേന്ദ്രകാലാവസ്ഥാ നിരീക്ഷണ കേന്ദ്രത്തിന്റെ പ്രവചനം.
