ചെന്നൈ: പോപ്പുലര് ഫ്രണ്ട്, എസ്ഡി പി ഐ എന്നീ സംഘടനകള് നിരോധിക്കണമെന്നാവശ്യപ്പെട്ട തമിഴ്നാട് ഗവര്ണര് ആര്.എന്. രവിയെ അഭിനന്ദിച്ച് പോസ്റ്ററുകള് പതിച്ച് ഹിന്ദുമുന്നണി. എന്നാല് തമിഴ്നാട് പൊലീസ് ഈ പോസ്റ്ററുകള് ചിന്തീയെറിഞ്ഞു.
മെയ് ആറിന് ഒരു പുസ്തകപ്രകാശനചടങ്ങിലാണ് ഗവര്ണര് പോപ്പുലര് ഫ്രണ്ടിനെ ഇന്ത്യയ്ക്കെതിരായി ഉയരുന്ന ഭീഷണിയെന്ന് ചൂണ്ടിക്കാട്ടിയത്. ഈ മതമൗലിക ഗ്രൂപ്പിന് അവരുടെ യഥാര്ത്ഥ തീവ്രവാദപ്രവര്ത്തനങ്ങള് മറച്ചുപിടിക്കാന് ഇന്ത്യയില് 16 മുന്നണികളുമായി ബന്ധമുണ്ടെന്നും തമിഴ്നാട് ഗവര്ണര് ആര്.എന്. രവി അഭിപ്രായപ്പെട്ടിരുന്നു.
“ആത്യന്തികമായി പോപ്പുലര് ഫ്രണ്ടിന്റെ ലക്ഷ്യം രാജ്യത്തെ ഉള്ളില് നിന്ന് അസ്ഥിരപ്പെടുത്തുക എന്നതാണ്. ഇവരാണ് അഫ്ഗാനിസ്ഥാനിലേക്കും ഇറാനിലേക്കും സിറിയയിലേക്കും ആളുകളെ അയയ്ക്കുന്നത്. ഇവരെല്ലാം പോപ്പുലര് ഫ്രണ്ടുകാരാണ്.”- രവി പറഞ്ഞു.
“സ്വന്തമായി സ്ഥാപിത രാഷ്ട്രീയതാല്പര്യങ്ങളുള്ള ചില രാഷ്ട്രീയപാര്ട്ടികളുടെ പിന്തുണ പോപ്പുലര് ഫ്രണ്ടിന് ലഭിക്കുന്നുണ്ട്. നമ്മള് വളരെയധികം ശ്രദ്ധിക്കേണ്ട ഒരു ഭീഷണിയാണിത്. രാജ്യം ഇവരെ നേരിടാന് പ്രാപ്തരാകണം.”- ഗവര്ണര് സൂചിപ്പിച്ചു.
“സര്ക്കാരിന്റെ ശ്രദ്ധയെ വ്യതിചലിപ്പിക്കാന് ശ്രമിക്കുന്നത് അവരുടെ തെറ്റിദ്ധാരണ മാത്രമാണ്. ഒടുവില് അവര് നിരാശപ്പെടും. കരസേനയും ഇന്ത്യന് സുരക്ഷാ സേനയും അവരെ കൈകാര്യം ചെയ്യാന് ശേഷിയുള്ളവരാണ്”.- തമിഴ്നാട് ഗവര്ണര് ചൂണ്ടിക്കാട്ടി.
ഗവര്ണറുടെ ഈ പ്രസംഗത്തെ തുടര്ന്നാണ് മധുരൈയിലും തിരുനെല്വേലിയിലും മെയ് 12ന് ഗവര്ണര്ക്കെതിരെ പോസ്റ്ററുകള് ഉയര്ന്നുവന്നു. ഇതിന് പിന്നില് പോപ്പുലര് ഫ്രണ്ട് പ്രവര്ത്തകരായിരുന്നു. ഗവര്ണര് ആര്എസ് എസിനെ പിന്തുണയ്ക്കുന്ന വ്യക്തിയാണെന്ന് ആരോപിച്ചായിരുന്നു പോസ്റ്ററുകള്. തമിഴില് എഴുതിയ പോസ്റ്ററുകളില് തമിഴ്നാട് ഗവര്ണര് പ്രസ്താവന പിന്വലിക്കണമെന്നും ആവശ്യപ്പെട്ടിരുന്നു. “ആര്എസ്എസിനെ പിന്തുണച്ച് വിഷം തുപ്പരുത്”. “പൊതുജനങ്ങളുടെ താല്പര്യങ്ങള്ക്ക് എതിരായി ഗവര്ണര് പ്രവര്ത്തിക്കരുത്” – പോസ്റ്ററുകള് ആവശ്യപ്പെടുന്നു.
ഇതേ തുടര്ന്ന് മധുരൈ തല്ലകുളം പൊലീസ് പോപ്പുലര് ഫ്രണ്ട് ഭാരവാഹികളായ മുഹമ്മദ് അബുദാഹിര്, സയ്യിദ് ഇസാക്ക് എന്നിവര്ക്കെതിരെ കേസെടുത്തെങ്കിലും അറസ്റ്റ് ചെയ്തില്ല. പകരം തമിഴ്നാട് പൊലീസ് ഹിന്ദു മുന്നണി ഗവര്ണറെ അഭിനന്ദിച്ച് പതിച്ച പോസ്റ്ററുകള് കീറിക്കളയുകയായിരുന്നു.
ഗവര്ണറെ പ്രകീര്ത്തിച്ച് തന്റെ വീടിന് മുന്നില് പതിച്ച പോസ്റ്ററുകള് പൊലീസുകാര് നീക്കിയതിനെ ഹിന്ദു മുന്നണി നേതാവ് കുട്രാല നാഥന് ചോദ്യം ചെയ്തു. ഒരു വീഡിയോയില് പൊലീസുമായി വാദപ്രതിവാദം നടത്തുന്നതിന്റെ വീഡിയോയും പുറത്തുവന്നിട്ടുണ്ട്.
ഡിഎംകെ സര്ക്കാരും ഗവര്ണറും തമ്മില് വടംവലി നടക്കുന്ന പശ്ചാത്തലത്തില് പൊലീസിനെ സര്ക്കാരിനെതിരായ ചട്ടുകമായി ഉപയോഗിക്കുകയാണ് ആഭ്യന്തര വകുപ്പിന്റെ കൂടി ചുമതലയുള്ള സ്റ്റാാലിന് എന്ന് പറയുന്നു.
