ന്യൂദല്‍ഹി: ഇന്ത്യയില്‍ നിന്നുള്ള വിദ്യാര്‍ത്ഥികളെ തിരിച്ചുവിളിക്കാന്‍ തയ്യാറാകാത്ത ചൈനയുടെ നടപടിയില്‍ പ്രതിഷേധിച്ച് ചൈനക്കാര്‍ക്കുള്ള ടൂറിസ്റ്റ് വിസ ഇന്ത്യ നിഷേധിച്ചതോടെ ചൈന അടങ്ങി. രണ്ട് വര്‍ഷം മുന്‍പ് കോവിഡ് മഹാമാരി മൂലം ഇന്ത്യയില്‍ കുടുങ്ങിയ ഒരു വിഭാഗം വിദ്യാര്‍ത്ഥികളെ തിരിച്ചുവിളിക്കുമെന്ന് ചൈന വെള്ളിയാഴ്ച പ്രഖ്യാപിച്ചിരിക്കുകയാണ്.
കഴിഞ്ഞ ദിവസം പാകിസ്ഥാനില്‍ നിന്നും ശ്രീലങ്കയില്‍ നിന്നുമുള്ള വിദ്യാര്‍ത്ഥികളെ തിരിച്ചുവിളിച്ചിട്ടും ഇന്ത്യന്‍ വിദ്യാര്‍ത്ഥികളുടെ കാര്യത്തില്‍ തീരുമാനം എടുക്കാതായപ്പോഴാണ് ഇന്ത്യ ചില നയതന്ത്ര സമ്മര്‍ദ്ദങ്ങള്‍ ചൈനയുടെ മേല്‍ ചെലുത്താന്‍ തീരുമാനിച്ചത്. ഇതോടെയാണ് ചൈന തീരുമാനം തിരുത്തിയത്.
ഇന്ത്യന്‍ വിദ്യാര്‍ത്ഥികളെ തിരിച്ചുകൊണ്ടുവരാനുള്ള പ്രവര്‍ത്തനങ്ങള്‍ തുടങ്ങിക്കഴിഞ്ഞതായി ചൈനയുടെ വിദേശകാര്യ വക്താവ് സാവോ ലിജിയന്‍ പറഞ്ഞു. ഇനി തിരിച്ചുവിളിക്കാന്‍ പോകുന്ന ഇന്ത്യന്‍ വിദ്യാര്‍ത്ഥികളുടെ ലിസ്റ്റ് ഇന്ത്യന്‍ സര്‍ക്കാരിന് അയയ്‌ക്കേണ്ട ജോലി മാത്രമേ ബാക്കിയുള്ളൂവെന്നും ലിജിയന്‍ പറഞ്ഞു.
2019 ഡിസംബറില്‍ കോവിഡ് മഹാമാരി തുടങ്ങിയപ്പോള്‍ ഇന്ത്യയിലെത്തിയ 23000 ഇന്ത്യന്‍ മെഡിക്കല്‍ വിദ്യാര്‍ത്ഥികള്‍ക്ക് അതിന് ശേഷം ചൈനയിലേക്ക് മടങ്ങാന്‍ കഴിഞ്ഞിട്ടില്ല. പല തവണ അഭ്യര്‍ത്ഥിച്ചിട്ടും ചൈനീസ് സര്‍ക്കാരില്‍ നിന്നും അനുകൂല തീരുമാനമൊന്നും ഉണ്ടായില്ല. എന്നാല്‍ കഴിഞ്ഞ ദിവസം ശ്രീലങ്ക, പാകിസ്ഥാന്‍ എന്നിവിടങ്ങളില്‍ നിന്നുള്ള വിദ്യാര്‍ത്ഥികളെ തിരിച്ചുവിളിക്കാനുള്ള നടപടി ചൈന തുടങ്ങിയതോടെയാണ് ഇന്ത്യ ഭാഷ കടുപ്പിച്ചത്. അതിന് ഫലമുണ്ടായി.
“ചൈന ഏതാനും ഇന്ത്യന്‍ വിദ്യാര്‍ത്ഥികളെ തിരിച്ചുവിളിക്കും.ചൈനയിലെ രോഗസാഹചര്യം, അന്താരാഷ്‌ട്ര തലത്തിലുള്ള കോവിഡ് സാഹചര്യം എന്നിവ കണക്കിലെടുക്കും. എല്ലാ വിദേശവിദ്യാര്‍ത്ഥികള്‍ക്കും ഒരേ പരിഗണന ആയിരിക്കും”- സാവോ ലിജിയാന്‍ പറഞ്ഞു.
പ്രതികരിക്കാൻ ഇവിടെ എഴുതുക: