കൊച്ചി: നമ്പർ 18 ഹോട്ടൽ ഉടമ റോയ് ജെ വയലാറ്റ് ഒന്നാം പ്രതിയായ പോക്സോ കേസിന് പിന്നിലെ വില്ലത്തി അഞ്ജലി റിമാദേവ് എന്ന് അന്വേഷണ സംഘം. പോക്സോ കേസിലെ പരാതിക്കാരിയായ അമ്മയോടും മകളോടും കടം വാങ്ങിയിരുന്ന 13 ലക്ഷം രൂപ തിരികെ കൊടുക്കാതിരിക്കാൻ അഞ്ജലി ഒരുക്കിയ കെണിയായിരുന്നു റോയ് വയലാറ്റിനെതിരായ പോക്സോ കേസ്. ഇതില്‍ അമ്മയും പ്രായപൂര്‍ത്തിയാകാത്ത മകളും വീണുപോവുകയായിരുന്നു.
പോക്സോ കേസിലെ പരാതിക്കാരിയായ അമ്മയെയും മകളെയും കൊച്ചിയിലെ റോയ് വയലാറ്റിന്റെ ഹോട്ടലില്‍ അഞ്ജലി എത്തിച്ചത് ഈ ദുരുദ്ദേശ്യത്തോടെയായിരുന്നു. റോയ് പെൺകുട്ടിയെ പീഡിപ്പിക്കുന്ന ദൃശ്യങ്ങൾ പകർത്തി പെൺകുട്ടിയുടെ അമ്മയെ ഭീഷണിപ്പെടുത്തുകയായിരുന്നു അഞ്ജലിയുടെ ലക്ഷ്യം. കേസിലെ മൂന്നാം പ്രതിയാണ് കോഴിക്കോട്ടെ സ്വകാര്യ സംരംഭകയായ അഞ്ജലി റിമ ദേവ്.
അഞ്ജലിയുടെ ഈ തട്ടിപ്പിനെക്കുറിച്ച് തനിക്ക് അറിയില്ലെന്ന് റോയ് വയലാറ്റ് മൊഴി നൽകിയതായും അന്വേഷണ സംഘം പറയുന്നു. മോ‍ഡലുകൾ വാഹനാപകടത്തിൽ കൊല്ലപ്പെട്ട കേസിൽ റോയിയുടെ കൂട്ടുപ്രതിയായ സൈജു എം തങ്കച്ചനാണ് ഈ പോക്സോ കേസിലെ രണ്ടാം പ്രതി.
സൈ‍ജുവിൽ നിന്ന് റോയിയുടെ വഴിവിട്ട താൽപര്യങ്ങളെ കുറിച്ച് അറിഞ്ഞ അഞ്ജലി, ഇയാളുമായി ചേർന്ന് ഒരുക്കിയ കെണിയിൽ പെൺകുട്ടിയെയും അമ്മയെയും അകപ്പെടുത്തുകയായിരുന്നു. ഫാഷൻ രംഗത്ത് മികച്ച അവസരം ഒരുക്കാൻ കഴിയുന്ന സംരംഭകൻ എന്ന നിലയിലാണ് അഞ്ജലി പെൺകുട്ടിക്കും അമ്മയ്‌ക്കും റോയിയെ പരിചയപ്പെടുത്തിയത്.
ഫാഷൻ രംഗത്ത് അവസരം വാഗ്ദാനം ചെയ്ത് ഒട്ടേറെ പെൺകുട്ടികളെ അഞ്ജലി കൊച്ചിയിലേക്ക് കൂട്ടിക്കൊണ്ടു വന്നിരുന്നതായും അന്വേഷണ സംഘം കണ്ടെത്തി. പോക്സോ കേസിന് പുറമേ, അഞ്ജലിക്കും സൈജുവിനും എതിരെ പൊലീസ് മനുഷ്യക്കടത്ത് കേസും രജിസ്റ്റർ ചെയ്തിട്ടുണ്ട്.
പ്രതികരിക്കാൻ ഇവിടെ എഴുതുക: