വാഷിംഗ്ടണ്‍: യുഎസ് സുപ്രീം കോടതിയുടെ 233 വര്‍ഷത്തെ ചരിത്രത്തിലാദ്യമായി, കറുത്ത വര്‍ഗക്കാരിയായ വനിതാ ജഡ്ജി. ഒമ്പതംഗ ബെഞ്ചില്‍ ജഡ്ജിയായി പ്രവര്‍ത്തിക്കാന്‍ കേതന്‍ജി ബ്രൗണ്‍ ജാക്‌സണെ സെനറ്റ് സ്ഥിരീകരിച്ചു. 53-47 വോട്ടിനെ തുടര്‍ന്നാണ് സ്ഥിരീകരണം. 2021 ജൂണ്‍ മുതല്‍, രാജ്യത്തെ ഏറ്റവും ശക്തമായ രണ്ടാമത്തെ കോടതി എന്ന് വിളിക്കപ്പെടുന്ന യുഎസ് അപ്പീല്‍ കോടതിയില്‍ ജഡാജിയാണ് കേതന്‍ജി.
ഈ വേനല്‍ക്കാലത്ത് വിരമിക്കുന്ന ലിബറല്‍ സുപ്രീം കോടതി ജസ്റ്റിസ് സ്റ്റീഫന്‍ ബ്രെയറുടെ പിന്‍ഗാമിയായി കേതന്‍ജി ന്റെ നാമനിര്‍ദ്ദേശം പ്രസിഡന്റ് ജോ ബൈഡന് ഫെബ്രുവരിയില്‍ പ്രഖ്യാപിച്ചിരുന്നു. ‘കേതന്‍ജി ജാക്‌സന്റെ സ്ഥിരീകരണം രാജ്യത്തിന്റെ ചരിത്ര നിമിഷമായിരുന്നു,’ ജഡ്ജിക്കൊപ്പം സെല്‍ഫിയെടുക്കുന്ന ഫോട്ടോ സഹിതം ബിഡന്‍ ട്വീറ്റ് ചെയ്തു.
‘ഞങ്ങളുടെ പരമോന്നത കോടതിയെ അമേരിക്കയുടെ വൈവിധ്യം പ്രതിഫലിപ്പിക്കുന്നതിലേക്ക് ഞങ്ങള്‍ മറ്റൊരു ചുവടുവെപ്പ് നടത്തിയിട്ടുണ്ട്,’ ‘അവള്‍ അവിശ്വസനീയമായ ഒരു ജസ്റ്റിസായിരിക്കും, ഈ നിമിഷം അവളുമായി പങ്കുവെക്കുന്നതില്‍ ഞാന്‍ അഭിമാനിക്കുന്നു” അദ്ദേഹം പറഞ്ഞു.
കേതന്‍ജിയുടെ നിയമനം കീഴ്‌ക്കോടതിയില്‍ പ്രവര്‍ത്തിക്കുന്ന കറുത്തവര്‍ഗക്കാരായ വനിതാ ജഡ്ജിമാര്‍ക്ക് പ്രതീക്ഷ നല്‍കുന്നതാണെന്ന് ഡാളസ് കൗണ്ടിയിലെ ജഡ്ജിമാരായ ഷെക്വറ്റ കെല്ലി റ്റാമി കെംപ്, ഓഡ്ര റൈലി എന്നവര്‍ അഭിപ്രായപ്പെട്ടു. ഏതൊരു ജഡ്ജിയുടേയും ഏറ്റവും ഉയര്‍ന്ന സ്വപ്നത്തിന്റെ സാക്ഷാത്ക്കാരമെന്ന് പറയുന്നത് പരമോന്നത കോടതിയിലെ ജഡ്ജി പദം ലഭിക്കുക എന്നതാണ്. ഡാളസ്സിലെ സ്‌റ്റേറ്റ് ഡിസ്ട്രിക്റ്റ് ജഡിജിയായ ഓഡ്ര റൈലി അഭിപ്രായപ്പെട്ടു.
പതിനഞ്ചു വര്‍ഷം മുമ്പ് ഡാളസ് കൗണ്ടി ക്രിമിനല്‍ കോടതിയില്‍ വെളുത്തവര്‍ഗ്ഗക്കാരായ വനിതാ പുരുഷ ജഡ്ജിമാരുടെ ആധിപത്യമായിരുന്നു. എന്നാല്‍ ഇന്ന് ഡാളസ് ഫ്രാങ്ക് ക്രോലി കോര്‍ട്ട് കെട്ടിടത്തിലെ പകുതിയിലധികം ജഡ്ജിമാര്‍ കറുത്തവര്‍ഗ്ഗക്കാരാണെന്നും, അതില്‍ കൂടുതലും വനിതകളാണെന്നും ചൂണ്ടികാണിക്കുന്നു. ഇപ്പോള്‍ ഡാളസിലെ വനിതാ ജഡ്ജിയായ ഷെക്വിറ്റ കെല്ലി തന്റെ അനുഭവം പങ്കിട്ടു.
ഹൈസ്‌ക്കൂളില്‍ തുടര്‍ച്ചയായി എ. വിദ്യാര്‍ത്ഥിയായിരുന്ന കെല്ലിയോട് അന്നത്തെ സ്‌ക്കൂള്‍ കൗണ്‍സിലര്‍ പറഞ്ഞത്, ഒരിക്കലും നിയമം പഠിക്കുന്നതിന് സ്‌ക്കൂളില്‍ പോകാന്‍ കഴിയില്ലെന്നാണ്. ഒരുപക്ഷേ നിനക്ക് ഒരു ബ്യൂട്ടീഷന്‍ ആകാന്‍ കഴിയുമെന്നാണ്. ഇന്ന് സുപ്രീം കോടതി ജഡ്ജിയായി യു.എസ്. സെനറ്റ് അംഗീകരിച്ച കീതാന്‍ജി ബ്രൗണ്‍ ജാക്‌സന്‍ തന്റെ ജീവിതത്തിലെ ഏറ്റവും പ്രയാസകരമായ സാഹചര്യത്തിലൂടെയാണ് കടന്നു പോയത്. ഇതിനെയെല്ലാം തരണം ചെയ്യാന്‍ കഴിഞ്ഞുവെന്നതാണ് കീതാന്‍ജിയുടെ നിയമനം നല്‍കുന്ന സന്ദേശമെന്നും കെല്ലി പറഞ്ഞു.
കീതാന്‍ജിക്കെതിരെ ഉയര്‍ത്തിയ എല്ലാ ആരോപണങ്ങളും നിഷ്പ്രഭമാക്കുന്നതായിരുന്നു അവര്‍ക്ക് ലഭിച്ച അംഗീകാരമെന്ന് സ്‌റ്റേറ്റ് ഡിസ്ട്രിക്റ്റ് ജഡ്ജായ റ്റാമി ടെംപ് അഭിപ്രായപ്പെട്ടു.
ജന്മഭൂമി ഓണ്‍ലൈന്‍