കൊച്ചി : പാതയോരത്തെ കൊടിതോരണങ്ങള്‍ നീക്കണമെന്ന ഹൈക്കോടതി ഉത്തരവിനെതിരെ സര്‍വ്വകക്ഷി യോഗം വിളിച്ചതില്‍ സംസ്ഥാന സര്‍ക്കാരിന് ഹൈക്കോടതിയുടെ വിമര്‍ശനം. പാതയോരങ്ങളില്‍ കൊടി തോരണങ്ങളും ബോര്‍ഡുകളും സ്ഥാപിക്കുന്നതിനെതിരെയുള്ള ഇടക്കാല ഉത്തരവിനെതിരെയാണ് സര്‍ക്കാര്‍ സര്‍വ്വകക്ഷിയോഗം സംഘടിപ്പിച്ചത്.
യാത്രക്കാര്‍ക്കും പൊതുജനങ്ങള്‍ക്കും ബുദ്ധിമുട്ട് ഉണ്ടാക്കുന്ന പ്രചാരണങ്ങളെ ഹൈക്കോടതി രൂക്ഷമായി വിമര്‍ശിച്ചിരുന്നു. ഇതിനെതിരെ വിളിച്ചു ചേര്‍ത്ത യോഗത്തില്‍ പ്രതിപക്ഷ നേതാവ് വി.ഡി. സതീശന്‍ അടക്കം സംസ്ഥാനത്തെ വിവിധ പാര്‍ട്ടികൡലെ പ്രതിനിധികള്‍ യോഗത്തില്‍ പങ്കെടുത്തിരുന്നു.
എന്നാല്‍ കോടതി ഉത്തരവ് മറികടക്കാന്‍ സര്‍വകക്ഷി യോഗം വിളിച്ചതാണ് ഇതെന്ന് ജസ്റ്റിസ് ദേവന്‍ രാമചന്ദ്രന്‍ വിമര്‍ശിച്ചു. കോടതി ഉത്തരവുള്ളപ്പോള്‍ കൊടി തോരണങ്ങള്‍ വയ്‌ക്കാന്‍ അനുമതി വേണമെന്ന് പാര്‍ട്ടികള്‍ പറയുന്നു. ഇത് കോടതിയില്‍ പറയാന്‍ ധൈര്യം കാണിക്കുന്നില്ല. ഉത്തരവ് ലംഘിച്ച് എങ്ങനെ മുന്നോട്ട് പോകുമെന്നും ജസ്റ്റിസ് ദേവന്‍ രാമചന്ദ്രന്‍ ചോദിച്ചു.
അതേസമയം രാഷ്‌ട്രീയ പാര്‍ട്ടികള്‍ക്കും സാമുദായിക സാംസ്‌കാരിക സംഘടനകള്‍ക്കും പ്രചാരണത്തിന് അവസരം നിഷേധിക്കരുതെന്ന് സര്‍വ്വകക്ഷിയോഗം ആവശ്യപ്പെട്ടു. സ്വകാര്യ മതിലുകള്‍ കോമ്പൗണ്ടുകള്‍ എന്നിവിടങ്ങളില്‍ ഉടമസ്ഥരുടെ അനുമതിയോടെ ഗതാഗതം ബാധിക്കാത്ത വിധത്തില്‍ കൊടിതോരണങ്ങള്‍ കെട്ടാം. സമ്മേളനങ്ങള്‍ ഉത്സവങ്ങള്‍ എന്നിവയോട് അനുബന്ധിച്ച് പാതയോരങ്ങളില്‍ മാര്‍ഗ തടസമുണ്ടാക്കാതെ താത്കാലികമായി അലങ്കാര പ്രചാരണങ്ങള്‍ എന്നിവയ്‌ക്കായി എത്ര ദിവസം മുമ്പ് കെട്ടുമെന്നും എത്ര ദിവസത്തിനുള്ളില്‍ നീക്കം ചെയ്യണം എന്നത് സംബന്ധിച്ച് മുന്‍കൂര്‍ അനുമതി വാങ്ങണം തുടങ്ങിയ നിര്‍ദ്ദേങ്ങളാണ് മുഖ്യമന്ത്രി മുന്നോട്ട് വെച്ചിരിക്കുന്നത്. ഈ തീരുമാനങ്ങള്‍ അഡ്വക്കേറ്റ് ജനറല്‍ മുഖേന ഹൈക്കോടതിയെ അറിയിക്കും.
പ്രതികരിക്കാൻ ഇവിടെ എഴുതുക: