കൊച്ചി : നടിയെ ആക്രമിച്ച കേസ് അന്വേഷിച്ച ഉദ്യോഗസ്ഥരെ കൊല്ലാന് ഗൂഢാലോചന നടത്തിയെന്ന കേസ് റദ്ദാക്കണമെന്ന ദിലീപിന്റെ ഹര്ജി തള്ളി ഹൈക്കോടതി. കേസ് സ്റ്റേ ചെയ്യില്ലെന്നും അന്വേഷണം തുടരാമെന്നും ഹൈക്കോടതി ഉത്തരവിട്ടു. കേസില് ദിലീപിനുള്ള തിരിച്ചടിയാണ് കോടതിയുടെ ഈ വിധി.
അതേസമയം കേസില് നിര്ണ്ണായകമായേക്കാവുന്ന തെളിവുകള് ദിലീപ് അഭിഭാഷകന്റെ ഓഫീസില് വെച്ച് നശിപ്പിച്ചതായി അതിജീവിത ബാര് കൗണ്സിലില് പരാതി നല്കി. ഇതിനെ തുടര്ന്ന് ഫോണുകളില് നിന്നും നീക്കം ചെയ്തത് കേസുമായി ബന്ധമില്ലാത്ത സ്വകാര്യ സംഭാഷണങ്ങളാണ്. കൂടാതെ തന്റെ വീട്ടില് ജോലി ചെയ്തിരുന്ന സഹായി ദാസനെ, ഡിവൈഎസ്പി ബൈജു പൗലോസ് ഭീഷണിപ്പെടുത്തി മൊഴി നല്കിച്ചുവെന്നും ദിലീപ് ഇതിന് മറുപടിയായി ഹൈക്കോടതിയില് നല്കിയ സത്യവാങ്മൂലത്തില് വ്യക്തമാക്കിയിരുന്നു. എന്നാല് അതിജീവിത പരാതി നല്കിയത് ഇ മെയില് വഴിയാണ്. ഇത് സ്വീകരിക്കാനാകില്ലെന്നും ചട്ടപ്രകാരം പരാതി ലഭിച്ചാല് നടപടി കര്ശ്ശന സ്വീകരിക്കാമെന്നുമായിരുന്നു കൗണ്സിലിന്റെ മറുപടി.
അതിനിടെ ആക്രമിച്ച കേസുമായി ബന്ധപ്പെട്ട് ദിലീപ് കോടതിക്ക് കൈമാറാത്ത വിവരങ്ങള് ഫോണ് രേഖകള് നശിപ്പിച്ച സൈബര് വിദഗ്ധന്റെ പക്കലുണ്ടെന്ന് ക്രൈംബ്രാഞ്ച് കണ്ടെത്തി. അഭിഭാഷകന്റെ ഓഫീസില് വെച്ച് ഫോണ് രേഖകള് നശിപ്പിച്ചത് സായി ശങ്കറെന്ന സൈബര് വിദഗ്ധനാണെന്ന് കണ്ടെത്തിയിട്ടുണ്ട്. ഇതുമായി ബന്ധപ്പെട്ട കൊച്ചിയിലെ സായി ശങ്കറിന്റെ വീട്ടില് ക്രൈംബ്രാഞ്ച് പരിശോധന നടത്തി വരികയാണ്.
അഭിഭാഷകന്റെ ഓഫീസില് വെച്ച് നശിപ്പിക്കാന് നല്കിയ വിവരങ്ങള് ഇയാള് ദിലീപ് അറിയാതെ കൈവശപ്പെടുത്തുകയായിരുന്നു. ഫോണിലെ ചില വിവരങ്ങള് അന്വേഷണ സംഘം കണ്ടെത്തിയെന്നും റിപ്പോര്ട്ടുകളില് പറയുന്നുണ്ട്. സായി ശങ്കറിനെ അന്വേഷണ സംഘം ഉടന് ചോദ്യം ചെയ്യും.
